Atyraýda ortalyq kópirdiń deformatsııalyq tigisterin aýystyrý jumysy keler jylǵa qaldy
ATYRAÝ.KAZINFORM — Bıyl ǵana ortasha jóndeýden ótken ortalyq kópirdiń deformatsııalyq tigisterin aýystyrý jumysy keler jylǵa qaldy. Alǵashynda ákimdik qajetti materıaldar Reseıden osy apta jetkiziletinin aıtsa, endi bul merzim kelesi aptaǵa aýysqan.
Atyraý qalasynyń ákimdigi kópirde paıda bolǵan jaryqtarǵa qatysty bergen alǵash túsiniktemesinde tigisterdi aýystyrýǵa qajetti materıaldar osy apta óńirge jetkiziletinin habarlaǵan edi.
Endi jospar ózgergen. Jolaýshylar kóligi jáne avtomobıl joldary bóliminiń bas mamany Sálimjan Musabaevtyń aıtýynsha, merdiger mekeme Reseıdiń Ýfa qalasyndaǵy «Tehnonıkol» kompanııasyna qajetti materıaldarǵa tapsyrys bergen. Olar kelesi aptada Atyraýǵa jetkiziledi dep kútilýde. Materıal óńirge jospardaǵy ýaqytta jetkizilgenniń ózinde qurylys jumysyn júrgizý úshin kúnniń jylynǵanyn kútý kerek. ıAǵnı, bul jumys 2027 jyldyń kóktemine qalyp otyr. Ákimdik ókilderi ázirge kópirdiń taǵdyryna qatysty qandaı da bir sheshim aıtý erte deıdi.
— Deformatsııalyq tigisterdi ornatý jumysy aýa temperatýrasy +20 gradýs bolǵan jaǵdaıda ǵana júrgiziledi. Búginde bólim tarapynan Jaıyq ózeni arqyly ótetin kópirlerge, onyń ishinde ortalyq kópirge tehnıkalyq tekserý júrgizilip jatyr. Tıisti qorytyndy qarasha aıynyń sońyna deıin daıyn bolady. Degenmen qazirdiń ózinde ortalyq kópirdi ári qaraı qalaı paıdalanýǵa bolatyny jóninde tehnıkalyq tekserý júrgizip jatqan kompanııadan usynys berýdi suradyqSoǵan sáıkes, kópir ýaqytsha jabylýy nemese aýyr júk kólikteriniń qozǵalysyna shekteý qoıylýy múmkin. Ázirge naqty sheshim joq. Tıisti usynys pen qorytyndyny kútip otyrmyz, — dep túsindirdi Sálimjan Musabaev.
Jalpy uzyndyǵy 16 metr bolatyn 6 deformatsııalyq tigisti aýystyrý josparlanǵan. Ákimdik ókilderiniń sózinshe, deformatsııalyq tigisterdi aýystyrý úshin 1 apta qajet, ıaǵnı ol ýaqytta kópir jabyq bolady.
Aıta keteıik, sheneýnikter bul kópirdi jóndeýge qazynadan qarjy qarastyrylmaǵan. Ákimdik kópirdegi jóndeý jumysy kimniń esebinen istelip jatqanyn túsindirdi.
— Abaı kóshesin ortasha jóndeý jumysynyń negizgi bóligi aıaqtaldy. Jóndeý barysynda Azattyq kóshesinen teatrǵa deıingi 480 metr joldyń eki jaǵyndaǵy jaıaý júrginshiler joly jaqsy jaǵdaıda bolǵandyqtan, tósemtastardy aýystyrý qajet bolmady. Osyǵan baılanysty únemdelgen qarajat esebinen ortalyq kópirdiń asfalt jabynyn tolyq jańartý týraly sheshim qabyldandy. Sonymen qatar merdigerge kópirdiń deformatsııalyq tigisterin de aýystyrý tapsyryldy, -dep tolyqtyrdy Sálimjan Musabaev.
Qazir ortalyq kópirden basqa Jaıyq ózeniniń ústine salynǵan taǵy 5 kópirdiń jaǵdaıy tekserilip jatyr. Bul jumys úshin qazynadan 80 mln teńgeden astam qarjy bólingen.
