Atyraýda ońtústik-shyǵys jeli kúsheıip, shań kóterildi
ATYRAÝ. KAZINFORM — Atyraýda qurǵaq ári jeldi aýa raıyna baılanysty shańdy daýyl qalyptasty. Qazgıdromettiń Atyraý oblysy boıynsha fılıalynyń málimetinshe, buǵan jaýyn-shashynnyń bolmaýy jáne ońtústik-shyǵys jeliniń kúsheıýi sebep bolǵan.
Mamandardyń túsindirýinshe, óńir aýmaǵynda antıtsıklonnyń yqpaly baıqalyp, jaýyn-shashyn bolmaǵan. Sonyń saldarynan jerdiń betki qabaty qatty qurǵaǵan.
Ońtústik-shyǵystan soqqan jeldiń kúsheıýi qurǵaq topyraqtyń usaq bólshekterin aýaǵa kóterip, shańdy daýyldyń qalyptasýyna ákelgen.
Qazgıdromettiń boljamynsha, erteń oblys aýmaǵynda ońtústik-shyǵystan soǵatyn jeldiń jyldamdyǵy sekýndyna 7-12 metrge jetedi. Jeldiń baǵyty saqtalatyndyqtan, qurǵaq jer betinen shań-tozańnyń qaıta kóterilý qaýpi bar.
Alaıda jeldiń ekpini búgingideı qatty bolmaıdy dep kútiledi. Osyǵan baılanysty erteń shańdaný qarqyndylyǵy búginmen salystyrǵanda tómenirek bolady degen boljam bar.
Eske salaıyq, 24 qyrkúıekte Pavlodar, Aqtóbe, Almaty qalalarynda, túnde Qostanaı, Óskemen, Semeı, Rıdder, Astana qalalarynda qolaısyz meteorologııalyq jaǵdaılar kútiletinin jazǵan edik.
