Atyraýda óner mektebi 650 myńnyń fortepıanosyn 1,5 mln teńgeden almaq bolǵan

 Atyraý oblysynda óner mektebi bir fortepıanony 1,5 mln teńgeden satyp almaq bolǵan. Mýzykalyq aspaptyń ortasha baǵasy budan 2,3 esege arzan, dep habarlaıdy Kazinform.

Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, bul derekti volonterler anyqtaǵan.

– Mahambet aýdandyń bilim bólimine qarasty Z.Eşanova atyndaǵy balalar óner mektebi fortepıanonyń bir danasyn 1 mln 510 myń 400 teńgeden satyp alýdy josparlaǵan. Osylaısha 10 mýzykalyq aspap úshin jalpy somasy 15 mln 104 myń teńge qarastyrylǵan, - dep málim etti departamenttiń baspasóz qyzmeti.

Sybaılas jemqorlyqqa qarsy volonterler toby mýzykalyq aspaptyń ortasha baǵasyna monıtorıng júrgizdi.

Monıtorıng barysynda josparda kórsetilgen taýardyń ortasha baǵasy 651 myń 544 teńge ekeni anyqtalyp otyr.

– Eriktiler aralasqannan keıin taýardyń baǵasy ózgertilip, 870 myń teńge bolyp belgilendi. Osylaısha eriktiler mýzykalyq aspaptyń baǵasynan 6 mln 404 myń teńge kólemindegi bıýdjet qarajatynyń únemdelýine yqpal etti, -dep habarlady departamenttiń baspasóz qyzmeti.

Eske sala ketelik, buǵan deıin Atyraý oblysynda aýdandyq ákimdik kóshetti úsh ese qymbatqa satyp almaq bolǵanyn habarlaǵan edik.

Maqat aýdany ákiminiń apparaty kóshet satyp alý baǵasyn úsh esege kótergen.

Ár túp kóshetti 15 myń teńgeden satyp alýdy josparlaǵan. Kóshettiń naryqtaǵy baǵasy – 5 myń teńge.

Al, aýdandyq ákimdik bul maqsatqa 1,5 mln teńge bólgen.