Atyraýda Olımpıada rezervin daıarlaý ortalyǵy ashyldy
ATYRAÝ. KAZINFORM – Atyraýda olımpıada rezervin daıarlaıtyn jańa ortalyq paıdalanýǵa berildi.
Sport nysanynyń saltanatty ashylýyna oblys ákimi Bolat Aqsholaqov qatysyp, jańa ortalyqtyń ashylýyn sportshylardy qoldaýdyń aıqyn nátıjesi dep atap ótti.
— Sport — tek jarys pen jeńis emes. Bul — rýhty shyńdaıtyn, jastardy tártip pen eńbekqorlyqqa baýlıtyn úlken mektep. Bizdiń basty maqsatymyz — balalar men jastardyń sportpen turaqty shuǵyldanýyna jaǵdaı jasaý, daryndy sportshylardy jastaıynan qoldap, halyqaralyq dodalarda el namysyn abyroımen qorǵaıtyn naǵyz chempıondardy tárbıeleý. Jańa jattyǵý ortalyǵy osy maqsattarǵa qyzmet etedi dep senemiz. Munda bizdiń sportshylarymyz jattyǵyp qana qoımaı, armanyna bir qadam jaqyndaı túsedi. Olımpıada rezervin daıarlaý ortalyǵy — jaı ǵana jańa ǵımarat emes, jańa jeńisterdiń bastaýy,— dedi oblys ákimi.
Joba merdigeri — “Vek-Stroy-Com” JShS. Qurylys 2025 jylǵy 1 mamyrda bastaldy. Ortalyq úsh zamanaýı sport zaldan turady, ınfraqurylymy tolyq qarastyrylǵan. Ǵımarattyń jalpy aýdany — 1 881 sharshy metr. Jańa ortalyqta grek-rım jáne erkin kúres palýandaryn, dzıýdoshylar men taekvondoshylardy, sondaı-aq boksshylardy daıarlaýǵa jaǵdaı jasalǵan, fıtnes zaldary da bar. Sport sektsııalaryna 300-ge jýyq tárbıelenýshi tartý josparlanyp otyr.
Ortalyq dırektory Rashıt Kulbaevtyń aıtýynsha, jańa keshenniń ashylýy sportshylardy daıarlaý júıesiniń sapasyn jańa deńgeıge kóterýge múmkindik beredi.
— Búginde ortalyqta 16 men 25 jas aralyǵyndaǵy 290 sportshy jattyǵady. Olardan oblystyq qurama komanda jasaqtaýdy oılap otyrmyz. Óńir bapkerlerinen bólek, shetelden bilikti mamandardy tartý da josparda bar. Ortalyq tolyq paıdalanýǵa berilgen soń sportshylardy respýblıkalyq jáne halyqaralyq jarystarǵa, sonyń ishinde Olımpıada oıyndaryna daıyndaımyz, — dedi Rashıt Kulbaev.
Saltanatty is-shara aıasynda lenta qııý rásimi jasaldy. Keıin qonaqtar ortalyqtyń jumysymen tanysyp, sport zaldaryn aralap shyqty.
Jańa nysan Atyraýda olımpıadalyq sport túrlerin damytýǵa, jas atletterdiń sheberligin shyńdaýǵa jáne aımaqtyń sport rezervin daıarlaý júıesin jetildirýge jol ashpaq.
