Atyraýda oqýshylar úziliste de shahmat oınaı alady
ATYRAÝ. KAZINFORM — Atyraýda Keleshek mektebinde shahmat kabıneti paıdalanýǵa berildi, dep habarlaıdy oblys ákimdiginiń baspasóz qyzmeti.
Respýblıka kúni qarsańynda Atyraý qalasyndaǵy «Keleshek mektepteri» ulttyq jobasy aıasynda ashylǵan № 50 jalpy orta bilim beretin mektepte oqýshylardyń zııatkerlik áleýetin arttyrýǵa baǵyttalǵan jańa shahmat kabıneti ashyldy.
Bul ıgi bastama Qazaqstan Respýblıkasy Úkimetiniń elimizde shahmatty damytýdyń keshendi jospary aıasynda júzege asyrylyp jatqan «Shahmat negizderi» bilim berý baǵdarlamasymen sabaqtasyp otyr.
Atalǵan baǵdarlama Qazaqstan shahmat federatsııasynyń qoldaýymen jáne jergilikti bilim berý basqarmasymen birlesip iske asyrylýda. Joba aıasynda Atyraý oblysyndaǵy 100 mekteptiń 1–2-synyptaryna «Shahmat negizderi» páni engizilip, 273 synyptaǵy 5700-ge jýyq oqýshy qamtylǵan. Sonymen qatar 253 pedagog Qazaqstan shahmat federatsııasynyń «Bilim berýdegi shahmat. Bastapqy deńgeı» baǵdarlamasy boıynsha arnaıy biliktilikti arttyrý kýrsynan ótken.
Osy baǵyttaǵy júıeli jumystardyń jalǵasy retinde № 50 jalpy orta bilim beretin mektepte shahmatty damytýǵa qolaıly jaǵdaı jasalyp, arnaıy kabınet jabdyqtaldy.
Jańa kabınet oqýshylardyń shahmat oıynyna qyzyǵýshylyǵyn arttyryp qana qoımaı, olardyń logıkalyq jáne synı oılaý qabiletin, zeıinin, este saqtaý daǵdysyn, strategııalyq josparlaý jáne sheshim qabyldaý mádenıetin qalyptastyrýǵa múmkindik beredi.
Mekteptegi ereksheliktiń biri — dálizde arnaıy jasaqtalǵan shahmat alańy. Bul keńistik oqýshylardyń úzilis ýaqytyn mazmundy ótkizýine, ózara ıntellektýaldyq saıysqa túsýine jáne shahmatty mektep ómiriniń kúndelikti mádenıetine aınalmaq.
Mektep basshylyǵynyń pikirinshe, shahmat — balanyń ıntellektýaldyq damýyna yqpal etetin, tózimdilikke, tártipke, jaýapkershilikke jáne alǵa qoıǵan maqsatqa júıeli túrde umtylýǵa tárbıeleıtin mańyzdy qural.
— Bizdiń basty maqsatymyz — oqýshylarǵa shahmat oıynyn úıretýmen shektelmeı, olardyń tereń oılaýyna, ár qadamyn saralap, sanaly sheshim qabyldaýyna jaǵdaı jasaý. Shahmat arqyly biz bilimdi, zerdeli, básekege qabiletti ári jaýapkershiligi joǵary jas urpaq tárbıeleýdi kózdeımiz, — dedi mektep dırektory Amangýl Baımuhanova.
