Atyraýda oqýshyǵa qol kótergen muǵalim ózge mektepke dırektor bolyp taǵaıyndalǵan

ATYRAÝ. KAZINFORM – Atyraý oblysynda mektep muǵalimniń oqýshylarǵa qol kótergeni anyqtalyp otyr. Al jaqynda ol ózge mektepke dırektor bolyp taǵaıyndalǵan.

Áleýmettik jelide muǵalimniń sabaq kezinde eki oqýshyǵa qol kótergeni týraly vıdeo tarady. Vıdeoda er adam eki uldy jelkesinen julqylyp, birin beldiginen joǵary kótergen. Oqýshynyń biri synyptan shyǵyp ketken. 

Atyraý oblystyq bilim basqarmasynyń baspasóz qyzmeti atalǵan derekke baılanysty túsinik berdi. 

– Jelide muǵalim men oqýshylardyń arasyndaǵy kıkiljiń túsirilgen vıdeoǵa baılanysty mynany habarlaımyz. 2024 jylǵy 4 qarashada S.Juparǵalıev konkýrs nátıjesimen jalpy bilim beretin Qadyr Myrza Álı atyndaǵy mektepke dırektor bolyp taǵaıyndaldy. Onyń bilim salasyndaǵy jalpy eńbek ótili – 35 jyl. Taǵaıyndaý kezinde ata-analar men qyzmetkerler tarapynan shaǵym túsken joq. Konkýrstan barlyq talap pen krıterııge sáıkes ótti, -dep habarlady basqarmanyń baspasóz qyzmeti.

Qazir oblystyq bilim basqarmasy atalǵan derekke qatysty qyzmettik tekserýdi bastaǵan. 

– Qyzmettik tekserý júrgizilip jatyr. Onyń qorytyndysymen zańdylyqqa sáıkes shara qabyldanady, -dep málim etti basqarmanyń baspasóz qyzmetinen. 

Eske sala ketelik, budan buryn Atyraýda áskerı baǵyttaǵy «Sarmat» mektebinde tekserý júrip jatqanyn habarlaǵan edik.