Atyraý oblysynda kıikpen kelgen kene tórt túlikke qaýip tóndirdi

ATYRAÝ. KAZINFORM – Atyraý oblysynyń Qurmanǵazy aýdanyndaǵy Azǵyr, Asan, Súıindik aýyldyq okrýgterinde kıikten taraǵan kene tórt túlikti shaǵyp jatyr. Bul týraly sharýalar dabyl kóterdi.

Atyraý oblystyq Aýyl sharýashylyǵy jáne jer qatynastary basqarmasynyń málimetinshe, atalǵan aýyldyq okrýgterdiń aýmaǵynda kıik sany kóbeıgen.

– Qurmanǵazy aýdanynda kıik sanynyń kóbeıýine baılanysty 4 sáýir kúni arnaıy top jolǵa shyqty. Top quramynda Veterınarııalyq baqylaý jáne qadaǵalaý komıtetiniń «Veterınarııa boıynsha referenttik Ulttyq ortalyǵy» RMK, Veterınarııalyq baqylaý jáne qadaǵalaý komıtetiniń Atyraý oblystyq aýmaqtyq ınspektsııasy, Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy j»ne Atyraý oblystyq Aýyl sharýashylyǵy jáne jer qatynastary basqarmasynyń mamandary bar. Atalǵan aýmaqtaǵy sharýagerlerdiń shaǵymy boıynsha kıikterdegi keneler aýyl sharýashylyǵy janýarlaryna kóship, maldyń denesinde shamadan tys kóbeıgen. Keneniń babezıoz (pıroplazmoz), anaplazmoz jáne basqa da asa qaýipti aýrýlardyń tasymaldaýshysy bolýy múmkin ekendigi aıtylyp otyr, - dep habarlady oblystyq basqarmadan.

Osyǵan oraı joǵaryda atalǵan mekeme mamandary aýmaqtaǵy kıikterden asa qaýipti aýrýlarǵa qarsy synamalar men patologııalyq materıaldar alynady. Materıaldar saraptamaǵa jiberiledi.

– Aldaǵy aptada kórshiles Batys Qazaqstan oblysynan ǵylymı qyzmetkerlerdi shaqyrtý kózdelip otyr. Olar Qurmanǵazy aýdanyndaǵy jaıtty zerdelep, aldyn alý sharalary jóninde semınar-keńester ótkizedi, - dep málim etti basqarmadan.

Basqarmanyń málimetine súıensek, Qurmanǵazy aýdanyndaǵy úsh aýyldyq okrýgte 169 myń 468 mal esepke alynǵan. Onyń ishinde 27 myń 704 múıizdi iri qara, 23 myń 171 jylqy, 1 055 túıe jáne 117 myń 538 qoı-eshki bar. Bul – oblysta tirkelgen tórt túliktiń 20 paıyzy.

Eske sala ketelik, budan buryn Atyraýdaǵy Jylyoı aýdany sharýalaryna tórt túlikti qaýipsiz aýmaqqa shyǵarý eskertilgenin jazǵan bolatynbyz.