Atyraýda naýryzǵa arnalǵan kontsert kezinde 80-ge jýyq bala joǵalǵan
ASTANA. KAZINFORM — Atyraýda kontsert kezinde ata-anasynan kóz jazyp qalǵan 80-ge jýyq bala din aman tabyldy, dep habarlaıdy Polisia.kz saıty.
— Naýryz meıramyna arnalǵan merekelik is-shara kezinde Isataı-Mahambet alańynda 78 bala ata-anasynan kóz jazyp qalǵan. Olardyń barlyǵy jedel túrde tabylyp, zańdy ókilderine tabystaldy. Olardyń basym bóligi bir saǵatqa jetpeı anyqtaldy. Tek bir jasóspirimdi polıtseıler 3 saǵatqa jýyq izdedi, — delingen habarlamada.
Sonymen qatar, kópshilik shara barysynda ata-anasynan kóz jazyp qalǵan 7 jastaǵy jasóspirim beınekameralar arqyly anyqtaldy. Búldirshin anasyn tappaǵan soń, birden onyń jumys ornyna barýǵa sheshim qabyldaǵan. Balaqaıdy kamera arqyly anyqtaǵan ınspektorlar anasyna ákep qaýyshtyrdy.
Mundaı oqıǵalarǵa baılanysty polıtsııa ata-analarǵa adamdar kóp jınalatyn oryndarda balalarǵa muqııat bolýdy, olardy qaraýsyz qaldyrmaýdy suraıdy.
Buǵan deıin Atyraýdaǵy Isataı men Mahambet atyndaǵy alańǵa 25 myńnan astam turǵyn jınalyp, Naýryz meıramyn toılaǵanyn jazdyq. Qonaqtarǵa arnalyp 30-ǵa jýyq aqshańqan úı tigilip, olardyń árqaısysy qazaq halqynyń baı mádenıeti men salt-dástúrin dáriptedi.
