Atyraýda Naýryz meıramyn toılaýǵa kelgen adamdarǵa vırtýaldy formatta bata berildi
ATYRAÝ. KAZINFORM – Mahambet-Isataı alańyna Naýryz meıramyn toılaýǵa kelgen turǵyndar men qala qonaqtaryna vırtýaldy bata berildi.
Arnaıy planshetke kez kelgen qonaq esimin jazady. Tańdaýyna sáıkes oǵan esimin aıtyp, Qazybek bı nemese Buqar jyraý bata beredi.
Bul vırtýaldy alań kóptiń qyzyǵýshylyǵyn oıatty. Jalpy budan basqa arnaıy kameraǵa túsken azamat túrli obrazdaǵy fotosyn telefonyna júkteı alatyn arnaıy burysh jasaqtalǵan. Sondaı-aq oqýshylar men stýdentterdiń JI, IT jáne robototehnıka baǵytynda jasaǵan jobalary kóptiń nazaryna usynyldy.
Aıta keteıik, Digital Nauryz aıasynda óńirde buǵan deıin árqaısysynyń júlde qory 500 myń teńge bolatyn hakaton, startap jobalarynyń jarysy jáne sporttyq baǵdarlamaý boıynsha saıys ótti. Sonymen qatar jańarý kúninde 100-den asa ónertapqyshtyń jobalary qoıylǵan «Digital Education: Tsıfrlyq bilim jáne jas ınnovatorlar» oblystyq forýmy uıymdastyryldy.
Buǵan deıin elimizde uıymdastyrylǵan «Hantalapaı» saıysyna 350 myńnan astam bala qatysqanyn jazǵan edik .