Atyraýda Naýryz meıramy keń kólemde toılandy
ATYRAÝ. KAZINFORM – Atyraýdaǵy Isataı men Mahambet atyndaǵy alańǵa 25 myńnan astam turǵyn jınalyp, Naýryz meıramyn toılady. Qonaqtarǵa arnalyp 30-ǵa jýyq aqshańqan úı tigilip, olardyń árqaısysy qazaq halqynyń baı mádenıeti men salt-dástúrin dáriptedi. Merekege kelgender ulttyq taǵamdardan dám tatyp, qolóner sheberleri men otandyq kásipkerler usynǵan ónimdermen tanysty.
Aımaq basshysy Serik Shápkenov kıiz úılerdi aralap, turǵyndardy Ulystyń uly kúnimen quttyqtady. Alańda qazaqtyń ulttyq áýenderi shyrqalyp, merekeniń kórigi dástúrli oıyndarmen qyza tústi.
Meıram «Qosh keldiń, áz Naýryz» atty teatrlandyrylǵan qoıylymmen bastalyp, kórermenderdi aıryqsha beınelermen jáne jarqyn kórinisterimen tańǵaldyrǵan áserli mıýzıkl-shoýmen jalǵasty.
Turǵyndarǵa tilegin bildirgen aımaq basshysy Serik Shápkenov óz sózinde ulttyq merekeniń mán-mańyzyn atap ótti.
– Naýryz – jańarý men jasampazdyqtyń ǵana emes, birlik pen tatýlyqtyń merekesi. Qazaq halqy ony ejelden molshylyq pen kelisimniń bastaýy retinde qadir tutqan. Bul kúni aıtylǵan aqjarma tilekter qabyl bolyp, darhan dalamyzǵa qut qonyp, yrys uıa salaryna shák keltirmegen. Bul nanym-senim urpaqtan urpaqqa jalǵasyp keledi. Barshańyzdy Naýryz meıramymen quttyqtaımyn, - dedi ol.
Merekege ulttyq oıyndar da aıryqsha ajar berdi. Myqtylar men eptiler qazaqsha kúres, qoı kóterý, buqatartys, alyptar aıqasy, asyq atý syndy jarystarda baq synap, jeńimpazdar aqshalaı syılyqtarmen marapattaldy.
Alańdaǵy toı qazaqstandyq estrada juldyzdary men jergilikti ónerpazdardyń kontserttik baǵdarlamasyna ulasty. Kópshilik «Alataý serileri» ansambliniń ánine bılegen 500 jastyń ónerin erekshe yqylaspen qabyldady. Merekeniń bas qonaǵy Ádilet Jaýǵashar shyrqaǵan ánder de kórermenniń zor qoshemetine ıe boldy.