Atyraýda nasybaıdy dúkende zańsyz satqan taǵy bir sheteldik ustaldy

ATYRAÝ. KAZINFORM – Atyraýda sheteldiktiń nasybaıdy dúkende zańsyz satqany anyqtaldy. Zańsyz taýar tárkilendi.

Prezıdent Atyraýda ótken Ulttyq quryltaıdyń úshinshi jıynynda nasybaıdyń ult saýlyǵyna zııanyna toqtalyp, quqyq qorǵaý organdarynyń shara qoldanbaıtynyn synaǵan edi. 

«Densaýlyqqa zııan ári uıat ádettiń biri – nasybaı atý. Onyń qalaı jasalatyny – belgili, eshqandaı sanıtarlyq talap saqtalmaıdy. Quramynda túrli dertti, sonyń ishinde onkologııalyq aýrýlardy qozdyratyn zattar bar. Nasybaıdy óndirýge jáne taratýǵa 2015 jyly tyıym salynǵan. Nasybaıdy óndirýge jáne taratýǵa 2015 jyly tyıym salynǵan. Biraq áli kúnge deıin kóshede, tipti azyq-túlik dúkenderinde ashyq satylyp jatyr», - degen edi Prezıdent. 

Atyraý oblystyq polıtsııa departamentiniń baspasóz qyzmetinen málim etkendeı, 102-arnasyna dúkende nasybaı satylyp jatqany habarlanǵan. 

«Atyraý qalalyq polıtsııa basqarmasy №1 ýchaskelik polıtsııa pýnktiniń ýchaskelik polıtsııa ınspektory, polıtsııa aǵa leıtenanty Shyńǵys Musaev Azattyq dańǵylynda ornalasqan dúkenge baryp, tekserý júrgizdi. Tekserý kezinde Ózbekstan Respýblıkasy azamatynyń zańsyz nasybaı ónimin saqtap, satqany anyqtaldy. Dúkennen 114 shaǵyn qaltaǵa salynǵan nasybaı tárkilendi», - dep habarlady departamenttiń baspasóz qyzmeti. 

Qazir atalǵan derekke qatysty tıisti is-qujattary jınaqtalyp jatyr. 

Eske sala ketelik, budan buryn Atyraýda nasybaıdy zańsyz satqan sheteldik azamat ustalǵanyn jazǵan edik.