Atyraýda munaı kompanııasynyń menedjerin asa qatygezdikpen óltirgen qaskóıge úkim shyqty

ATYRAÝ. KAZINFORM — Atyraý oblysynyń mamandandyrylǵan aýdanaralyq qylmystyq ister jónindegi soty 46 jastaǵy Bıbigúl Shpanovany asa qatygezdikpen óltirý isi boıynsha úkim shyǵardy.

Marqum iri munaı-gaz kompanııasy NCOC-de menedjer bolyp qyzmet atqarǵan. Bul týraly oblystyq sottyń baspasóz qyzmeti habarlady.

Sotta anyqtalǵandaı, aıyptalýshy Atyraý qalasynyń 38 jastaǵy turǵyny, Rembaza yqsham aýdanynda týǵan Arman Jetpisov. Ajyrasqan, resmı túrde jumyssyz, buǵan deıin alaıaqtyq faktileri boıynsha qylmystyq isterde fıgýrant bolǵan. Biraz ýaqyt ózin jóndeý jumystarymen aınalysatyn sheber retinde kórsetip, jábirlenýshiniń senimine kirgen.

— 2022 jyly jábirlenýshi jańa páter satyp alyp, oǵan jóndeý jumystaryn júrgizý barysynda Jetpisovpen tanysqan. Aıyptalýshy jábirlenýshiden avtoturaq ornyn jeńildikpen satyp alýǵa kómektesemin dep 400 myń teńge alǵan. Bul qarajatty ıemdenip, ýádesin oryndamaǵan. 2023 jyly jábirlenýshi qaıta habarlasyp, máseleniń sheshilmegenine baılanysty shaǵym túsiretinin aıtyp, eskertken. Ol júkti ekenin de aıtqan. Sol kúni aıyptalýshy mas kúıde jábirlenýshiniń úıine kelip, qylmystyq áreketin júzege asyrǵan, — delingen habarlamada.

Ol betperde kıip, pyshaqpen qarýlanyp, jábirlenýshini zorlap, keıin asa qatygezdikpen óltirgen.
Keıin páterdi tintip, seıften iri kólemde aqsha men altyn buıymdardy urlaǵan. Sondaı-aq marqumnyń avtokóligi men uıaly telefonyn alyp ketken. Jábirlenýshige keltirilgen materıaldyq zalal 13 mıllıon teńgeden asqan.

Sonymen qatar sottalýshyǵa QR Qylmystyq kodeksiniń birneshe baby boıynsha aıyp taǵylyp, sot otyrysynda aıyptalýshynyń kinási tolyq dáleldendi. Jábirlenýshilerdiń jáne kýágerlerdiń aıǵaqtary, saraptama qorytyndylary, beınejazbalar men zattaı aıǵaqtar sotqa usynylǵany jazylǵan. 

Sot jazany jeńildetetin mán-jaılardy anyqtamady. Qylmysty mas kúıde jasaǵany aýyrlatatyn jaǵdaı retinde qarastyryldy.

— Sot sheshimimen Arman Jetpisov barlyq epızod boıynsha kináli dep tanylyp, ómir boıyna bas bostandyǵynan aıyryldy. Sonymen qatar, marqumnyń týystaryna materıaldyq jáne moraldyq shyǵyn óndirildi. Úkim zańdy kúshine engen joq, — delingen sot taratqan aqparatta.

Eske sala keteıik, Atyraýda kompanııa menedjerin qatygezdikpen óltirgen kúdiktiniń isi sotqa joldanǵanyn jazǵanbyz.

Sonymen qatar Atyraýda áıeldiń ólimine baılanysty qylmystyq is qozǵalǵanyn jazǵanbyz.