Atyraýda munaı kompanııasyna 27,5 mln teńge aıyppul salyndy
ATYRAÝ. KAZINFORM – Atyraý oblysynda ekologııalyq zańnama talaptaryn buzǵan «Svetland-Oıl» JShS-ne 27,5 mln teńgeden astam aıyppul salyndy. Sonymen qatar kompanııanyń ekologııalyq ruqsatsyz júzege asyrylyp jatqan shyǵaryndylaryna tyıym salý úshin sotqa talap-aryz joldandy.
Atyraý oblysy boıynsha ekologııa departamentiniń málimetinshe, bıyl «Svetland-Oıl» JShS-ne qatysty talaptarǵa sáıkestigin tekserý jáne baqylaý obektisine barý arqyly profılaktıkalyq baqylaý júrgizilgen.
Baqylaý barysynda ekologııalyq ruqsat sharttarynyń oryndalmaǵany, ruqsatsyz shyǵaryndylar men tógindilerdiń júzege asyrǵany anyqtaldy. Sondaı-aq shyǵaryndylar normatıvteri jobasynda kórsetilmegen jáne qorshaǵan ortaǵa áserdi baǵalaý júrgizilmegen, memlekettik ekologııalyq saraptamanyń qorytyndysy alynbaǵan qosymsha obektiler paıdalanylǵan.
Budan bólek, qaldyqtardy túgendeý jónindegi esep tolyq tapsyrylmaǵany, jerdiń munaı ónimderimen lastanǵany, qaldyqtardyń hronologııalyq esebi júrgizilmegeni jáne óndiristik qaldyqtardyń jer betine shashylýyna jol berilgeni belgili boldy.
– Anyqtalǵan buzýshylyqtar boıynsha ákimshilik ister qozǵalyp, qaraý nátıjesinde «Svetland-Oıl» JShS-ne jalpy somasy 27,5 mln teńgeden astam aıyppul salyndy. Sonymen qatar Atyraý oblysynyń mamandandyrylǵan aýdanaralyq ekonomıkalyq sotyna kompanııanyń ekologııalyq ruqsatsyz júzege asyrylyp jatqan shyǵaryndylaryna tyıym salý týraly talap aryz joldandy, – dep málimdedi oblystyq ekologııa departamenti.
Buǵan deıin Qyzylordada ken ornyna qatysty shaǵymnan keıin jer qoınaýyn paıdalanýshyǵa aıyppul salynǵanyn habarlaǵan edik.
