Atyraýda munaı qaldyǵy bar temirjol tsısternasy jaryldy

Atyraýda munaı qaldyǵy bar temirjol tsısternasy jarylyp, tseh qabyrǵasy qulady, dep habarlaıdy Kazinform.

Oblystyq tótenshe jaǵdaılar departamentiniń qoǵammen baılanys toby atalǵan derekti rastady.

«Búgin, 14 jeltoqsanda jergilikti ýaqytpen saǵat 13:58-de Atyraý qalasyndaǵy Ońtústik óndiristik aımaqta ornalasqan «Batys Petroleum» JShS-ne tıesili №1 tsehtyń jýý-býlaý stantsııasynda jyljymaly temir jol quramyna tazalaý júrgizilgen. Sol kezde munaı shlamynyń qaldyǵy bar tsısternada gaz-aýa qospasynyń dúmpýi bolǵan. Sonyń saldarynan tseh qurylymy ishinara qulaǵan. Jalynnyń tutanýyna baılanysty avtomatty órt sóndirý qurylǵysy iske qosylǵan. «Semser-Órt sóndirýshi» JShS órt sóndirý bólimsheleri órt sóndirý jumystaryn júrgizdi», - dep habarlady departamenttiń qoǵammen baılanys toby. 

Oqıǵa ornyna Atyraý oblystyq Tótenshe jaǵdaılar departamentinen 48 qyzmetker men 5 tehnıka, «Apattar medıtsınasy» ortalyǵynan 3 qyzmetker, 1 tehnıka, «Semser-Órt sóndirýshi» JShS-niń 5 qyzmetkeri men 1 tehnıkasy jumyldyryldy. 

Tótenshe jaǵdaılar departamentiniń qyzmetkerleri barlaý jumystaryn júrgizdi. Eshkim zardap shekpegen. 

Eske sala ketelik, buǵan deıin Atyraý oblysynda 7 balasy bar otbasy turatyn úı tolyǵymen órtenip ketkenin jazǵan bolatynbyz.