Atyraýda múgedekterdiń quqyǵyn qorǵaıtyn birlestiktiń ótinishinen soń meıramhanaǵa aıyppul salyndy

ATYRAÝ. KAZINFORM – Atyraýda múgedekterdiń quqyǵyn qorǵaıtyn qoǵamdyq birlestiktiń ótinishinen soń meıramhanaǵa tekserý júrgizildi. Múmkindigi shekteýli adamdardyń kirýine jaǵdaı jasalmaǵan meıramhanaǵa aıyppul salyndy.

Halyqty áleýmettik qorǵaý salasyndaǵy retteý jáne baqylaý komıtetiniń Atyraý oblysy boıynsha departamentine múgedektigi bar adamdardyń qoǵamdyq birlestiginen ótinish túsken.

– Múgedektigi bar adamdar úshin qoljetimdiliktiń bolmaýy faktisi boıynsha meıramhanaǵa jospardan tys tekserý júrgizildi. Tekserý qorytyndysymen sýbekt aıyppul túrinde ákimshilik jaýapkershilikke tartyldy. Meıramhanaǵa buzýshylyqtardy joıý týraly nusqama berildi, - dep habarlady jergilikti departamentten.

Atyraý qalasynyń turǵyny Kenjebaı Muratov – ekinshi toptyń múgedegi. Onyń aıtýynsha, sońǵy kezde múgedekter úshin áleýmettik ınfraqurylymdy beıimdeýde oń ózgeris baıqalady.

– Qalamyzda múgedektigi bar azamattar úshin qyzmetterge qoljetimdilik burynǵydan áldeqaıda jaqsaryp keledi. Máselen, Atyraý qalasyndaǵy bank fılıalynda taktıldi kórsetkishter, mnemosulbalar qoıyldy. Kireberistegi esikter keńeıtilip, kedergiler alynyp tastaldy. Qazir ǵımaratqa esh kedergisiz kirip, qyzmet alýǵa bolady. Munda óte yńǵaıly pandýs ornatyldy, - deıdi Kenjebaı Muratov.

Eske sala ketelik, buǵan deıin atyraýlyq órender múgedekterdi ońaltýǵa arnalǵan qurylǵy oılap tapqanyn jazǵan bolatynbyz.