Atyraýda mototsıklmen túıege soǵylǵan jasóspirim oqıǵa ornynda mert boldy
ATYRAÝ. KAZINFORM – Atyraý oblysynda kámeletke tolmaǵan jasóspirim mototsıklmen kele jatyp túıege soqtyǵysqan. Aýyr jaraqat alǵan jasóspirim oqıǵa ornynda kóz jumdy.
Oqıǵa 27 shildede keshki mezgilde Qyzylqoǵa aýdanyndaǵy Saǵyz aýylynda bolǵan. Búgin bul derekti Atyraý oblystyq Polıtsııa departamentiniń baspasóz qyzmeti rastady.
«Keshki saǵat 21:30 shamasynda Saǵyz aýylynda 2010 jylǵy jasóspirim mototsıklmen kele jatyp, túıege soqtyǵysqan. Jasóspirim alǵan dene jaraqattarynyń saldarynan oqıǵa ornynda qaıtys bolǵan. Atalǵan derek boıynsha qylmystyq is tirkeldi. Qazir keshendi tergeý amaldary júrgizilip jatyr. Ózge aqparat tergeý múddesine sáıkes jarııalaýǵa jatpaıdy», - dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysyndaǵy Saǵyz aýylynyń jastary taǵy da tóbeleskenin habarlaǵan bolatynbyz.
Polıtsııa departamentiniń málimetinshe, Qyzylqoǵa aýdandyq polıtsııa bóliminiń qyzmetkerleri anyqtaý jumysyn júrgizýdi qolǵa alǵan. Atalǵan derek boıynsha buzaqylyq babymen qylmystyq is qozǵalyp, tergeý júrip jatyr.
