Atyraýda mıkroqarjy keńsesine qaraqshylyq jasaǵan kúdikti ustaldy

Atyraýda mıkroqarjy keńsesine qaraqshylyq jasaǵan kúdikti ustaldy, dep habarlaıdy Kazinform.

Atyraý oblystyq polıtsııa departamentiniń baspasóz qyzmetinen málim etkendeı, qaraqshylyq shabýyl keshe, 6 qarashada saǵat 11:00 shamasynda jasalǵan.

– Atyraý qalasyndaǵy M.Baımuhanov kóshesinde ornalasqan mıkroqarjy keńsesine 40 jastaǵy er adamnyń medıtsınalyq maskamen kirgeni týraly «102» operatoryna habarlanǵan. Jedel basqarý ortalyǵynyń qyzmetkerleri kúdik týdyrǵan er adamdy baıqap, ýchaskelik polıtsııa ınspektorlaryna baǵyttama bergen. Polıtseıler oqıǵa ornyna jetip, keńseden qaraqshylyq jolmen 341 myń teńgeni tonalǵanyn anyqtady. Oqıǵa ornynan boı tasalaǵan er adam ustaldy, - dep málim etti departamenttiń baspasóz qyzmetinen.

Qazir 40 jastaǵy er adamǵa qatysty QR Qylmystyq kodeksiniń 192-babynyń 2-bóligi 4-tarmaǵymen (Qaraqshylyq) tergep-tekserý bastaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Eske sala ketelik, budan buryn Atyraý oblysynda 100 mln teńgeniń kabeli men elektr baǵanalaryn urlaǵan top ustalǵanyn habarlaǵan bolatynbyz.

Kúdiktiler – Jylyoı aýdanynyń týmalary. Úsh kúdiktiniń biriniń «Gazel» avtokóliginen 4 shaqyrymdyq joǵary voltty elektr kabeli tárkilendi. Olar urlaǵan kabeldi Aqtóbe qalasynda ornalasqan temir-metall qabyldaý ortalyǵyna tapsyrǵan. Urlyqtan Jylyoı aýdany aýmaǵynda elektr baǵanalaryn ornatyp jatqan kompanııalarǵa 100 mln teńgeden astam shyǵyn keltirilgen. Kúdiktilerge «kúzetpen ustaý» túrindegi bultartpaý sharasy qoldanyldy.