Atyraýda mıynda suıyqtyq kóbeıgen 3 aılyq sábıge kúrdeli ota jasaldy

ATYRAÝ. KAZINFORM – Atyraýda 3 aılyq sábıdiń mıyndaǵy suıyqtyq qalypty mólsherden asyp ketken. Jergilikti hırýrg náresteniń mıyna kúrdeli ota jasady.

Atyraý oblystyq densaýlyq saqtaý basqarmasy baspasóz qyzmetiniń aqparatyna qaraǵanda, otany oblystyq balalar aýrýhanasynyń neırohırýrgi Shoder Arıpov jasaǵan. 

– Úsh aılyq sábıge «Ortalyq júıke júıesiniń damý aqaýy: týa bitken ishki okklıýzııalyq gıdrotsefalııa» dıagnozy qoıyldy. Gıdrotsefalııa – mı qarynshalarynda jınalǵan suıyqtyqtyń qalypty mólsherden asyp ketýinen týyndaıtyn aýyr aýrý. Іshki okklıýzııalyq gıdrotsefalııa kezinde lıkvordyń (julyn suıyqtyǵynyń) aǵýy buzylady. Sonyń saldarynan mıdyń keıbir bólikterine qysym túsedi. Bul ýaqytynda emdelmese, bolashaqta aýyr asqynýlarǵa ákelýi múmkin, -dep habarlady basqarmanyń baspasóz qyzmeti. 

Sol sebepten sábıge lıkvoroshýnttaý otasy shuǵyl jasalǵan. Bul – jınalǵan suıyqtyqty shyǵaryp, aǵýyn qalpyna keltiretin hırýrgııalyq ádis. 

– Mundaı emdeý ádisi mıdyń ishindegi qysymdy tómendetedi. Naýqastyń jaǵdaıyn jaqsartýǵa baǵyttalady. Balalar aýrýhanasyndaǵy dárigerlerdiń kásibı sheberliginiń nátıjesinde ota sátti ótti. Qazir náresteniń jaǵdaıy jaqsardy. Ol úıine jiberildi, -dep málim etti basqarmanyń baspasóz qyzmetinen. 

Eske sala ketelik, buǵan deıin Atyraý dárigerleri júkti áıelge kúrdeli otany tegin jasaǵanyn habarlaǵan edik.