1000 dollar avansty qaıtarmaǵan: Atyraýda kásipker Qaırat Nurtasty sotqa berdi
ATYRAÝ. KAZINFORM – Atyraý qalasynda kásipker belgili ánshi Qaırat Nurtasty sotqa berdi. Bul týraly jergilikti AtyrauPress saıty jazdy.
Málim bolǵandaı, atalǵan isti Almaty oblysynyń soty onlaın-rejımde qaraǵan. Ánshi jańa jyldyq korporatıv keshinde óner kórsetýi tıis bolatyn. Alaıda, uıymdastyrýshylar ánshiniń shamamen 15 mln teńge bolatyn shyǵynyn jaba almaıtyndyqtan kontsertti ótkizbeıtin bolyp sheshim qabyldap, bul jóninde ony 42 kún buryn eskertken.
Kásipkerdiń sózinshe, ol ánshiniń anasy Gúlzıra Aıdarbekovamen aýyzsha kelisken eken. Al, 1000 dollar kólemindegi avans somasyn Almatyda ánshiniń ókilderine beripti.
«Kontserttiń ótpeıtinin aıtqanymda menedjer aqshanyń qaıtarylmaıtynyn maǵan óte dóreki túrde jetkizdi. Keıin aýdıojazbalaryn óshirip tastady. Men ártisti sotqa berdim. Birinshi otyrysta jeńilip qaldyq, biraq men taǵy da shaǵymdandym. Sebebi, aqshamdy qaıtarǵym keledi», – deıdi kásipker Olga Hvan.
Sot jábirlenýshiniń talabyn qanaǵattandyrmady. Endi ol Joǵary sotta alty aı ishinde sot sheshimine shaǵymdana alady.
Buǵan deıin habarlaǵanymyzdaı, budan bylaı Qazaqstanda ártisterge beıádep áreketteri úshin aıyppul salynbaq.
