Atyraýda merdigerlerden 70 mln teńgege jýyq turaqsyzdyq aıyppuly óndirilgen

ATYRAÝ. KAZINFORM – Atyraýda ternderge birge qatysqan birneshe kompanııa baǵany qasaqana kótergen. Sondaı kompanııalardan 70 mln teńgege jýyq turaqsyzdyq aıyppuly óndirilgen.

Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtiń aıtýynsha, qurylysy uzaqqa sozylǵan jobalardaǵy sybaılas jemqorlyq qaýpi anyqtalyp otyr. 

– Departament qyzmetkerleri júrgizgen syrtqy taldaýlar nátıjesinde 13 túrli kúmándi nysan anyqtaldy. Merdigerlikke tartylǵan birneshe kompanııanyń ózara kelisimmen baǵany qasaqana kótergen. Bir-birimen baılanysy bar kompanııalar tenderge qatar qatysqan. Jobalyq-smetalyq qujattardy retteýdegi zań buzýshylyqtar erekshe nazarǵa alyndy. Osyndaı jaıttar negizge alynyp, jalpy somasy 70 mln teńgege jýyq turaqsyzdyq aıyby óndirildi, -deıdi Erulan Serikqalıev. 

Onyń deregine qaraǵanda, «AIKOM LTD» JShS josyqsyz merdigerler tizilimine engizilgen. Al «Ońdasyn Stroı» JShS-ǵa qatysty ótinim berilip otyr. Quqyq buzýshylyqtar boıynsha jaýapty tulǵalarǵa qatysty 5 is tıisti organdarǵa joldanǵan.

– Baqylaýǵa alynǵan nysannyń biri – Mahambet aýdanynyń Sarytoǵaı aýylyndaǵy mádenıet úıi. Onyń qurylysy 2017 jyly bastaldy. Sodan beri 3 merdiger aýysty. Keıin «Grand Master» JShS nysan qurylysyn tolyǵymen aıaqtady. Sybaılas jemqorlyqqa qarsy kúres tek esep berý quraly emes, naqty problemalardy anyqtap, zań men tártipti qalyptastyrýdyń tıimdi tásili, - dep málim etti Erulan Serikqalıev.

Eske sala ketelik, buǵan deıin Atyraýda mádenıet úıiniń qurylysyn júrgizetin merdiger úshinshi ret aýysqanyn habarlaǵan edik.