Atyraýda merdigerler jol qurylysyndaǵy aqaýlardy joıýǵa 418 mln teńge jumsaǵan

Atyraý oblysynda salynyp jatqan jolǵa sapasyz asfalt tóselgeni anyqtaldy. Merdigerler óz esebinen budan da ózge aqaýlardy joıý jumysyna 418 mln teńge jumsady, dep habarlaıdy Kazinform.

«Jol aktıvteriniń ulttyq sapa ortalyǵy» RMK Atyraý oblystyq fılıalynyń bólim basshysy Nurlan Jantýrınniń aıtýynsha, qurylysy júrip jatqan jáne kepildik merzimde turǵan joldardan birneshe aqaý anyqtalǵan. 

«Fılıal ınjenerleri jyl basynan beri oblys aýmaǵyndaǵy 95 nysanǵa 524 ret tekserý júrgizdi. Tekserý nátıjesimen 260 aqaý anyqtaldy. Jol qurylysyna paıdalanylǵan materıaldardan alynǵan 2 229 synama fılıal zerthanasynda tekserildi. Onyń ishinde 717 synama memlekettik standarttar talabyna sáıkes kelmedi. Sapasyz salynǵan joldar men memlekettik standart talaptaryna saı kelmeıtin qurylys materıaldary jaramsyz dep tabyldy», - dep habarlady Nurlan Jantýrın. 

Osyǵan baılanysty merdigerler men tapsyrys berýshilerden aqaýlardy qaıta qalpyna keltirý talap etilgen.

«Memlekettik standarttar talabyna sáıkes kelmeıtin jol qurylysy materıaldary sapaly materıaldarǵa aýystyryldy. Jalpy kólemi 121 myń sharshy metr joldyń betine óńdeý jumystary júrgizildi. Joldyń 7 385 sharshy metrine asfaltbeton jabyldysy qaıta salyndy. Al, 10 tekshe metr temirbetondy konstrýktsııa, 1 167 kópir qurylymy, 2 571 tonna ınertti materıal jańartyldy. Bul jumystarǵa merdigerlerdiń esebinen 418 mln 544 teńge jumsaldy», - dep málim etti Nurlan Jantýrın.

Onyń málimetine súıensek, bıyl Atyraý oblysynyń memlekettik sáýlet-qurylys baqylaý basqarmasyna 13 márte hat joldanǵan. Onyń úsheýi boıynsha tehnıkalyq qadaǵalaýshylarǵa aıyppul salynyp, 1 tehnıkalyq qadaǵalaýshynyń attestaty jarty jylǵa toqtatylǵan. Al, 9 hatqa teris jaýap alynyp, 1-eýi jaýapsyz qalǵan. 

Eske sala ketelik, buǵan deıin Atyraý oblysynda salynyp jatqan joldyń qalyńdyǵy talapqa saı emesin jazǵan bolatynbyz.