Atyraýda merdiger perzenthananyń syrtyn qaıtadan basqa túske boıaıtyn boldy

Atyraýda perınataldy ortalyqqa jóndeý júrgizip jatqan merdiger syrtqy qabyrǵany basqa túske boıaǵan. Sol sebepten bul tús qabyldanbady, dep habarlaıdy Kazinform.

Oblys ákiminiń orynbasary Jasulan Bısembıevtiń málimetinshe, perınataldy ortalyqtyń jóndeý jumysyna 966 mln teńge bólingen.

Atyraý oblystyq perınataldy ortalyǵy byltyrǵy qazan aıynda koronavırýs ınfektsııasy taraǵan kezde salynǵan modýldik aýrýhanaǵa ýaqytsha kóshirilgen.

Al modýldik aýrýhana Atyraý qalasynyń aýmaǵynan tysqary ornalasqan.

– Bıylǵy qazan aıynda perınataldy ortalyqty qoldanysqa berý josparlanǵan edi. Endi bul merzim keıinge shegerildi. Qazir jóndeý jumysy jalǵasyp jatyr. Máselen ǵımarattyń jeldetý júıesin jóndeý áli aıaqtalǵan joq. Buǵan qosa, merdiger mekeme nysannyń syrtqy qabyrǵasyn basqa túske aýystyryp jibergen. Al jobaǵa sáıkes nysannyń syrty qońyr tústi bolýy kerek edi. Muny merdiger eskermegen. Sol sebepten bul tús qabyldanǵan joq, - dep habarlady Jasulan Bısembıev.

Eske sala ketelik, budan buryn Atyraýdaǵy perınataldyq ortalyqtyń palatasyn tyshqan aralap júrgenin habarlaǵan bolatynbyz.

Ortalyqtyń baspasóz qyzmeti kemirgishterdiń baryn joqqa shyǵarmady.

«Perzenthana Atyraý qalasynan alys jerde ornalasqan. Ǵımarat jazyq dalada bolǵandyqtan dala tyshqandary bar. Alaıda, oblystyq perınataldy ortalyqtyń ákimshiligi bul máseleniń aldyn alý úshin dezınfektsııa jumystaryn jıi júrgizedi. Soǵan qaramastan tyshqandar ǵımarat ishinde júr. Aldaǵy kúnderi dezınfektsııa jumysy taǵy da júrgiziledi», - dep habarlaǵan edi perınataldy ortalyqtyń baspasóz qyzmeti.