Atyraýda 7 jyldan beri salynbaı turǵan mádenıet úıiniń qurylysy qaıta jandanady

ATYRAÝ. KAZINFORM — Atyraý oblysynda sybaılas jemqorlyq táýekeli kartasyna 8 nysan engizilgen. Endi sonyń birindegi qurylys jumysy qaıta bastalady.

Sybaılas jemqorlyqqa qarsy is-qımyl agentigi Atyraý oblystyq departamentiniń basshysy Erulan Serikqalıevtyń aıtýynsha, qurylysy uzaq merzimge sozylǵan nysandar arnaıy baqylaýǵa alynǵan.

«Sondaı nysandardyń biri — Mahambet aýdanynyń Sarytoǵaı aýylyndaǵy mádenıet úıi. Onyń qurylysyna 2017 jyly 260 mln teńge bólingen. Mádenıet úıi 200 orynǵa eseptelgen. Alaıda, nysan qurylysy merziminde aıaqtalmady. Merdigerge qatysty sot protsesi bastaldy. Atyraý oblysynyń mamandandyrylǵan aýdanaralyq ekonomıkalyq sotynyń sheshimimen merdiger „Stroı proekt-2017“ JShS-men aradaǵy shart buzyldy. Kompanııadan turaqsyzdyq aıyppuly óndirip alynyp, memlekettik satyp alýǵa josyqsyz qatysýshy dep tanyldy», -deıdi Erulan Serikqalıev.

Onyń aıtýyna qaraǵanda, osyǵan baılanysty obuzýshylyqtardy joıý, problemalyq nysandardyń qurylysyn aıaqtaý maqsatynda jospar bekitilgen.

Jaýapty memlekettik organdarǵa, qala men aýdandardyń ákimdikterine tapsyrmalar berilgen.

«Qazir atalǵan nysannyń qurylysyn aıaqtaý úshin jańa merdiger — „Grand Master“ JShS-men shart jasaldy. Merdiger qurylys-montaj jumystaryn qaıta bastaıdy. Osyndaı nysandardyń qurylysyn bıyl aıaqtaý josparlanyp otyr», -dep málim etti Erulan Serikqalıev.

Eske sala ketelik, budan buryn Atyraýda bes jyl buryn órtengen qonaq úı áli qalpyna keltirilmeı turǵanyn jazǵan edik.