Atyraýda memlekettik Týdy qoqysqa tastaýǵa baılanysty tergeý bastaldy

Atyraý oblysynda Memlekettik Tý qoqys úıindisine tastalǵan. Osyǵan baılanysty sotqa deıingi tergeý bastaldy, dep habarlaıdy QazAqparat tilshisi.

Bul týraly Facebook áleýmettik jelisindegi «Zello Atyraý» pablıginde vıdeo tarady.

Vıdeo keshe, 7 qazanda túsirilgen. Sheteldik kompanııa bazasynyń aýmaǵynda qoqys úıindisi jınalǵan. Aǵash qaldyqtarynyń arasynda memlekettik Tý jatyr. Týdy jumysshylar qoqystyń arasynan jınap alǵan.

Qoqys alańynyń janynda sheteldik kompanııanyń ataýy jazylǵan ǵımarat tur. Soǵan qaraǵanda bul óndiristik baza bolýy múmkin.

– Mynaý – «Sıchım» kompanııasynyń bazasy. Áne, joǵaryda «Sıchım» dep jazylyp tur, 8-bloktyń qasy. Mine, qoqystyń arasynda Tý jatyr, – deıdi jumysshynyń biri.

Osyǵan baılanysty oblystyq polıtsııa departamentiniń baspasóz qyzmeti sotqa deıingi tergeý bastalǵanyn málim etti. Alaıda, tergeý qaı kompanııaǵa qatysty júrip jatqanyn naqtylaǵan joq.

«QR Qylmystyq kodeksiniń 372-babyna (Memlekettik rámizderdi qorlaý) sáıkes sotqa deıingi tergeý amaldary júrgizilip jatyr. Ózge aqparat QR Qylmystyq-protsestik kodeksiniń 201-babyna (Sotqa deıingi tergep-tekserý derekterin jarııa etýge jol bermeý) sáıkes jarııalaýǵa jatpaıdy», – dep málim etti departamenttiń baspasóz qyzmetinen.

Elimizde memlekettik rámizderdi qorlaýǵa baılanysty Qylmystyq kodekste qylmystyq jaýapkershilik qarastyrylǵan. Joǵaryda atalǵan bapta «Qazaqstan Respýblıkasynyń memlekettik rámizderin qorlaý úsh myń aılyq eseptik kórsetkishke deıingi mólsherde aıyppul salýǵa, ne sol mólsherde túzeý jumystaryna, ne toǵyz júz saǵatqa deıingi merzimge qoǵamdyq jumystarǵa tartýǵa, ne eki jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady», - delingen.