Atyraýda Memlekettik rámizder kúni saltanatty túrde atalyp ótti
ASTANA. KAZINFORM —Atyraý qalasyndaǵy Memlekettik rámizder alańynda Qazaqstan Respýblıkasynyń Memlekettik Týyn kóterý rásimi ótti. Saltanatty is-sharaǵa oblys ákimi Serik Shápkenov, depýtattar, memlekettik jáne quqyq qorǵaý organdarynyń ókilderi, ardagerler, jastar men qala turǵyndary qatysty.
Merekelik jıynǵa jınalǵan jurtshylyq Ánurandy birge shyrqady.
Óńir basshysy Serik Shápkenov memlekettik rámizderdiń eldik rýhty nyǵaıtýdaǵy jáne otansúıgishtik qasıetterdi qalyptastyrýdaǵy erekshe rólin atap ótti.
— Memleket basshysy Qasym-Jomart Toqaev rámizderdiń halqymyzdy ortaq maqsattarǵa jumyldyryp, ulttyq rýhty asqaqtatýdaǵy rólin árdaıym aıryqsha atap aıtyp keledi. Rámizderdi qurmetteý — Otanǵa degen qurmettiń belgisi. Eńbektegen baladan eńkeıgen qarııaǵa deıin memlekettik nyshandarymyzdy qasterleı bilse, elge degen shynaıy súıispenshiliktiń bir kórinisi sol bolmaq. Kók Týymyz árdaıym bıikte jelbirep, Ánuranymyz jas urpaqty jigerlendire bersin! Táýelsizdigimiz tuǵyrly bolsyn! — dedi oblys ákimi.
Merekelik is-shara óńirdiń shyǵarmashylyq ujymdary daıyndaǵan kontserttik baǵdarlamamen qorytyndylandy.
