Atyraýda memlekettik balabaqsha qyzmetkerleri 3 aıdan beri jalaqy almaǵan
ATYRAÝ. KAZINFORM – Atyraý qalasyndaǵy №8 «Aqbota» sanatorıı-bóbekjaı-balabaqshasynyń 70-ten asa qyzmetkerine shilde aıynan beri aılyq tólengen joq. Mindetti áleýmettik medıtsınalyq saqtandyrý qoryndaǵy shottaryna da aqsha túspegen.
Saldarynan qyzmetkerler tipti dárigerlerge qarala almaı otyr. Olardyń sózinshe, balabaqsha ár qyzmetkerge shamamen 1 mıllıon teńge bereshek.
«Nesıemizdi tóleı almaı otyrmyz. Otbasymyzdyń turmys-tirshiligine qajetti tólemder men qyzmetke de aqsha joq. Al basshylyq úndemestiń oıynyn oınap otyr. Ózimizge mindettelgen jumystyń barlyǵyn isteımiz, sondyqtan eńbekaqymyzdy tolyq tólep, ústemeaqysyn qosyp bersin», - dedi balabaqsha qyzmetkeri Aıgúl Shaımardanova.
Másele elde engizilgen vaýcherlik júıege baılanysty týyndap otyr. Bul mektepke deıingi bilim berý mekemesi de osy júıege kóshken. Vaýcherlik júıege sáıkes mekemege memleket tarapynan aqsha balalardyń kelýine balabaqshaǵa kelgen kúnine baılanysty tólenedi. Bilim berý basqarmasynyń ókilderi shilde aıynan bastap balabaqshanyń kirisi azaıǵanyn aıtty. Al qyzmetkerler bolsa basshylyq bar qarjyny qaıda jetkizerin bilmeı, kishkentaılardyń tamaǵynan únemdeýge kiristi deıdi.
«Bizdiń balabaqshany ózge uıymmen salystyrýǵa kelmeıdi. Munda balalar qonady. Balalarǵa qunarly tamaq berilý kerek. Qazirgi ýaqytta tárbıelenýshilerge berilip jatqan astyń qunary azaıyp ketti. Shyndyqty aıtyp shyryldasaq basshylyq artymyzdan qalmaı, bizge qarsy shyǵady», - dedi balabaqsha qyzmetkeri Álııa Tájenova.
Atyraý oblystyq bilim berý basqarmasyndaǵylar máseleniń mán-jaıynan habardar. QR Oqý-aǵartý mınıstrligine №8 «Aqbota» sanatorıı-bóbekjaı-balabaqshasy men til kemistigi bar balalarǵa arnalǵan №20 Altynbalyq balabaqshasyn vaýcherlik júıeden bosatý týraly hat joldaǵan.
Búginde vaýcherlik júıe arqyly qarajat «Qarjy ortalyǵy» AQ-nan tikeleı balabaqshaǵa aýdarylyp otyr.
«Atyraý qalasyndaǵy 47 memlekettik jáne 128 jekemenshik balabaqsha shilde aıynan bastap vaýcherlik júıege kóshirildi. Memleket basshysynyń tapsyrmasyna oraı «Aqsha balanyń sońynan eredi» qaǵıdaty boıynsha Atyraý qalasynda jumys júrip jatyr. Bul júıeniń maqsaty – sapa, ashyqtyq jáne básekelestik. Qazirgi ýaqytta balabaqsha qyzmetkerleriniń jalaqysyn eseptep, tóleý boıynsha oblys ákiminiń qaýlysy daıyndalyp jatyr. Jýyrda olardyń aılyǵy beriletin bolady»,- dep jaýap qatty Atyraý oblystyq bilim berý basqarmasynyń bas mamany Gúlsim Gılmanova.
Eńbek ınpektsııasyna shaǵym eki apta buryn tússe de, ondaǵylar zerdeleýge endi ǵana kirisipti. Balabaqsha basshylyǵyna aıyppul salynady dep otyr.
Aıta keteıik, buǵan deıin Atyraýdaǵy balabaqshalarda qarjy tapshylyǵy týyndaǵany habarlanǵan bolatyn.