Atyraýda mekteptegi tegin tamaqtyń quny ózgermeıtin boldy
ATYRAÝ.KAZINFORM — Atyraý oblysynda mektep oqýshylaryna beriletin tegin ystyq tamaqtyń quny bıyl ózgermeıdi. Buǵan deıin ashanaǵa jaýapty kásipkerler azyq-túlik baǵasynyń qymbattaýyn jáne mázirdi alǵa tartyp, bir balaǵa bólinetin qarjyny 1 myń teńgege deıin arttyrýdy suraǵan. Alaıda oblystyq bilim berý basqarmasy naryqtaǵy baǵany saralaı kele, qazirgi bekitilgen qarjy kólemin jetkilikti dep tanyǵan.
Bıyl aqpanda oblystaǵy mektepterdi ystyq tamaqpen qamtyp otyrǵyn kásipkerlerdiń bir toby ár oqýshy úshin bólinetin aqshany 1 myń teńgege jetkizýdi surady.
Olar qarjynyń azdyǵynan balalarǵa kún saıyn jemis pen kókónis bere almaıtynyn aıtyp, sol kezdegi oblys ákimi Serik Shápkenov qarajatty kóbeıtýdi usynǵan edi.
Atyraý oblystyq bilim berý basqarmasynyń basshysy Marat Ábýovtyń aıtýynsha, bul usynys jan jaqty qaralǵan. Naryqtaǵy azyq-túlik quny saralanyp, ázirge qarjyny kóterý qajettiligi týyndamaǵan.
— Maýsymǵa baılanysty tamaqtar qymbattaıdy, sáıkesinshe bir mezgilderi arzandaıdy. Biz negizinen tamaqtyń arzandaǵan kezin nazarǵa almaımyz, ádette qymbattaǵan kezi aıtylady. Kásipker bıznes ókili bolǵandyqtan paıda túsirý baǵytynda jumys isteıdi. Al bizder bıýdjetti tıimdi paıdalaný baǵytynda jumys uıymdastyramyz, — dep túsindirdi basqarma basshysy Marat Ábýov.
Óńirde bastaýysh synyptarda bilim alatyn ár oqýshynyń kúndelikti ystyq tamaq qamtý úshin 720 teńge, al joǵary synyp oqýshysyna 837 teńge qaralǵan. Oblys mektepterde tegin ystyq tamaqpen qamtylatyn oqýshy sany 68 myńnan asady.
Óńirdiń bas ustazynyń aqparatyna súıensek, mektep ashanasyndaǵy balalarǵa arnalǵan mázirdi densaýlyq saqtaý basqarmasy bekitedi. Byltyr jańa mázir bekitilgen. Keıin usynystarǵa, keı ónimderdiń tapshylyǵyna baılanysty 3 ret ózgerttik.
— Atyraýda bir balanyń ystyq tamaǵyna bólingen qarjyny ózge óńirlermen salystyrsaq, orta deńgeıde turmyz. Bizder birtińdep bıýdjettiń múmkindigine jáne mázirdegi ózgeriske qaraı ózgertip jatyrmyz. Jańa mázir boıynsha ata-analar tarapynan tamaqtyń jelinbeýi boıynsha ótinish túspedi. Demek mázirdiń sapalyq quramy, tamaqty jeý kórsetkishi qalypty deńgeıde, — dep tolyqtyrdy Marat Ábýov.
Aıta keteıik, 2026-2027 oqý jyly óńirde 237 mektep jumys isteıdi. Olarda 155 myńnan asa oqýshy bilim alady dep boljanǵan.
Bilim salasyndaǵy ózekti máseleniń biri — balalar tasymaly. Buǵan deıin Atyraý oblysynda oqýshylardy tasymaldaýǵa 28 avtobýs jetispeıtinin jazǵan edik.
