Atyraýda mektepke jarylǵysh zat qoıyldy degen jalǵan aqparat tarady

ATYRAÝ. KAZINFORM – Atyraýda mektepke jarylǵysh zat qoıyldy degen aqparat rastalmady. Mektepten kúdik týdyratyn jarylǵysh zat tabylmady.

6 aqpanda Atyraý qalasyndaǵy №3 mekteptiń muǵalimi mektepte jarylǵysh zat qoıylǵany jóninde habarlama alǵan. Muǵalim bul týraly polıtsııaǵa habarlaǵan. 

Atyraý oblystyq polıtsııa departamentiniń baspasóz qyzmetinen málim etkendeı, jaryǵysh zat týraly aqparat jalǵan bolyp shyqqan. 

– Atyraý qalasyndaǵy mekteptiń muǵalimine kelgen jarylǵysh zat týraly aqparatqa sáıkes, quzyrly organdar tıisti tekserý jumystaryn júrgizdi. Kúdik týdyratyn zattar tabylǵan joq. Qazir atalǵan derekke qatysty «Terrorızm aktisi týraly kórineý jalǵan habarlaý» baby boıynsha qylmystyq is tirkeldi. Tergeý amaldary júrgizilip jatyr, - dep habarlady departamenttiń baspasóz qyzmeti. 

Keıbir aqparatqa qaraǵanda, muǵalimge kelgen habarlamada habarlasqan adam odan 80 mln teńge surap, bank kartanyń nomerin jibergen. 

– Bul derekti rastaı almaımyz. Biraq «Terrorızm aktisi týraly kórineý jalǵan habarlaý» boıynsha bes myń aılyq eseptik kórsetkish mólsherinde aıyppul salýǵa, ne sol mólsherde túzeý jumystaryna, ne bes jylǵa deıingi merzimde bas bostandyǵyn shekteýge, ne sol merzimge bas bostandyǵynan aıyrý jazasy kózdelgenin eskertemiz, - dep málim etti departamenttiń baspasóz qyzmetinen.

Eske sala ketelik, budan buryn Atyraýda jyl basynan beri zańsyz aınalymnan 11 kelige jýyq esirtki tárkilengenin habarlaǵan edik.