Atyraýda mektep janyndaǵy lagerler oqýshylardy qabyldaı bastady

ATYRAÝ. KAZINFORM – Atyraý oblysynda mektepter janynan 167 jazǵy lagerdiń jumysy bastaldy. Bul lagerlerde 10 myń jýyq oqýshy demalatyny kózdelip otyr.

Atyraý óńirlik kommýnıkatsııalar qyzmetiniń deregine súıensek, sondaı lagerdiń biri «Jaıly mektep» jobasymen iske qosylǵan №50 bilim ordasynyń janynan ashylǵan. Lagerge «Jaıly Camp» ataýy berilgen.

– Jazǵy saýyqtyrý lagerine bastaýysh synyptan 50 oqýshy qabyldandy. Balalardyń qaýipsizdigi úshin barlyq jaǵdaı jasaldy. Lagerde jumys isteýge bilikti mamandar tárbıeshi retinde tartyldy. Olar oqýshylardyń bos ýaqytyn tıimdi uıymdastyryp, túrli tanymdyq, sporttyq jáne mádenı sharalar ótkizýdi bastady, -deıdi lager jetekshisi Qurmangúl Ahmedıarova.

Onyń aıtýynsha, lager qyzmetin uıymdastyrý úshin QR Úkimetiniń №64 qaýlysy negizge alynǵan. Soǵan sáıkes kópbalaly, kúnkóris deńgeıi tómen, sondaı-aq, ataýly áleýmettik kómek alatyn otbasylardyń balalary qabyldanǵan. As máziri balalardyń jas erekshiligine qaraı ázirlenedi.

Lagerge alǵash kelgendiń qatarynda Aızere Amanqos ta bar. Onyń ata-anasy – kópbalaly otbasy.

– Jańadan ashylǵan lagerge kelgenime qýanyp júrmin. Maǵan óte unady. Tamaǵy dámdi, tárbıeshiler meıirimdi eken. Kóp dos taptym. Kún saıyn túrli kontsert pen sporttyq oıyndar ótkiziledi. Ár kúnimiz erekshe ótip jatyr, - deıdi oqýshy Aızere Amanqos.

Eske sala ketelik, buǵan deıin Atyraý oblysynyń oqýshylary jazǵy 3 saýyqtyrý lagerinde demalatynyn jazǵan edik.