Atyraýda mektep oqýshysyn pyshaqtaǵan jasóspirim 15 jylǵa sottaldy
ATYRAÝ. KAZINFORM — Atyraýdaǵy BINOM mektepteriniń birinde 13 jastaǵy qyzǵa pyshaqpen shabýyl jasaǵan 16 jastaǵy jasóspirim 15 jylǵa bas bostandyǵynan aıyryldy.
Sotta onyń qylmysty aldyn ala josparlaǵany, dápterlerine otbasy músheleri men qoǵamdy jek kóretini týraly jazbalar qaldyrǵany jáne sheteldegi jappaı kisi óltirý oqıǵalaryn jasaǵan qylmyskerlerge qyzyǵýshylyq tanytqany anyqtaldy.
Eki aıdan astam ýaqytqa sozylǵan sot protsesi alqabılerdiń qatysýymen ótti. Sottalýshy Qylmystyq kodekstiń 24-babynyń 3-bóligi jáne 99-babynyń 3-bóligi (jas balany óltirýge oqtalý) boıynsha kináli dep tanyldy.
Sýdıa Zarema Hamıdýllına úkimdi túsindirgen kezde jasóspirim 13 naýryz kúni mektepke úsh pyshaq, balǵa, qysqash jáne josparyn jazǵan dápterin alyp kelgenin aıtty. Ol shamamen 1 saǵat 20 mınýt boıy shabýyl jasaıtyn qyzdardy izdegen. Keıin sońǵy sabaqqa bara jatqan ózine beıtanys 13 jastaǵy qyzǵa shabýyl jasaǵan.
Sýdıanyń aıtýynsha, jasóspirim dápterine otbasyn, ata-anasyn jáne qoǵamdy jek kóretini, olardy óltirgisi keletini týraly jazbalar qaldyrǵan. Sondaı-aq shetelde mektepter men balabaqshalarǵa shabýyl jasap, ondaǵan balanyń ómirin qıǵan adamdardyń esimderin kóshirip jazǵan.
— Ol oqıǵa bolǵan kúni, ıaǵnı 13 naýryz tańǵy saǵat 6:55–te «búgin meniń kek alatyn kúnim», «búgin men qoǵamnan aqyry óshimdi alamyn, olar maǵan esh sebepsiz syrt kelbetimdi kelemejdep, maǵan tómen adam retinde qarady, qorlyq kórsetti, olardyń eshqaısysy ómir súrýge laıyqty emes, men olardy qatty jek kóremin jáne barlyǵy tez arada óledi dep úmittenemin» degen mazmunda jazba qaldyrǵan, — dedi sýdıa.
Budan bólek, fızıka dápterinen otbasyn óltirýge árekettengeni, biraq oıyn júzege asyra almaǵanyna ókinetini týraly jazba tabylǵan. Sýdıanyń sózinshe, jasóspirim kelesi jazbasynda aldynan shyqqan adamdardy pyshaqpen óltiretinin aıtqan. Sondaı-aq dápterinde áıelderdi jek kóretini týraly da jazǵan.
Sotta jasóspirimniń áleýmettik jeliler men kompıýterlik oıyndarǵa táýeldi bolǵany, tyıym salynǵan ınternet-resýrstardaǵy materıaldarǵa qyzyǵýshylyq tanytqany belgili boldy. Aqpan aıynda Ulttyq qaýipsizdik komıtetiniń qyzmetkerleri onyń jeke paraqshalarynda dinı ekstremıstik mazmundaǵy materıaldar jarııalaǵanyn anyqtap, teolog mamannyń qatysýymen túsindirý jumysyn júrgizgen.
— Sot otyrysynda zerttelgen málimetter oqýshynyń tuıyqtalýyna, kompıýterlik gadjetter men oıyndarǵa táýeldi bolýyna, shynaıy ómirden alshaqtaýyna áser etkenin kórsetti. Onyń minez-qulqynda qatygezdik belgileri qalyptasyp, qorshaǵan ortaǵa degen teris kózqarasy kúsheıgen, — dedi Zarema Hamıdýllına.
2025 jyldyń qazan aıynda sottalýshy mektep psıhologine synyptastarynyń ózin mazaqtaıtyny jóninde shaǵymdanǵan. Sotta onyń esimin burmalaý, ulty men syrtqy kelbetine tıisý jaǵdaılary rastalǵan. Alaıda júıeli túrde uryp-soǵý nemese qorlaý faktileri anyqtalmaǵan.
Memlekettik aıyptaýshy Maıra Erjanova bul istiń jasóspirimder arasyndaǵy quqyqbuzýshylyqtyń aldyn alý máselesine nazar aýdartatynyn atap ótti.
— Prokýratýra jasóspirimder arasyndaǵy quqyqbuzýshylyqtyń aldyn alý sharalaryn kúsheıtý, ata-analardyń bala tárbıesine qatysty jaýapkershiligin arttyrý, sondaı-aq bilim berý uıymdary men memlekettik organdar arasyndaǵy ózara is-qımyldy nyǵaıtý qajettigin atap ótti. Balalardyń quqyqtary men qaýipsizdigin qorǵaý — memleket pen qoǵam úshin basty mindet. Osyǵan baılanysty yqtımal qaýip-qaterlerdi der kezinde anyqtaý mańyzdy, — dedi memlekettik aıyptaýshy.
Osyǵan baılanysty sot pen alqabıler qylmysqa yqpal etken sebepter men jaǵdaılardy eskerip, Oqý-aǵartý mınıstri men Atyraý oblysynyń prokýroryna tıisti sharalar qabyldaý úshin jekeshe qaýly shyǵardy.
Sot úkimimen jasóspirim jazasyn kámeletke tolmaǵandarǵa arnalǵan qaýipsizdigi ortasha qylmystyq-atqarý júıesi mekemesinde óteıdi. Úkim zańdy kúshine engenge deıin kúzetpen ustalǵan bir kúni bas bostandyǵynan aıyrý merziminiń 1,5 kúnine teńestirilip esepteledi. Úkimdi oqyp bolǵan soń sýdıa Zarema Hamıdýllına sottalýshyǵa jazasyn óteý kezinde tártip buzbaı, ózin jaqsy jaǵynan kórsetse, merziminiń jartysyn ótegennen keıin bas bostandyǵynan aıyrýdy shekteý jazasyna aýystyrý týraly ótinish berýge quqyly ekenin túsindirdi.
Eske salaıyq, oqıǵa bıyl 13 naýryzda boldy. Qylmystyq oqıǵanyń saldarynan asa aýyr jaraqat alǵan oqýshy aýrýhanaǵa jetkizilip, ota jasaldy. Abyroı bolǵanda, oqýshy aman qaldy.
