Atyraýda mehanızator men sharýa qojalyq jetekshileri memlekettik nagradamen marapattaldy

ATYRAÝ. KAZINFORM – Atyraýda aýyl sharýashylyǵy qyzmetkerleriniń kásibı merekesine oraı bir top adam memlekettik nagradaǵa ıe boldy. Olardyń arasynda eńbek ardageri, mehanızator men sharýa qojalyǵynyń jetekshileri bar.

Oblys ákimi Serik Shápkenovtiń aıtýynsha, azyq-túlik qaýipsizdigin nyǵaıtýǵa, turǵyndardy sapaly aýyl sharýashylyǵy ónimderimen qamtýǵa úles qosyp júrgen sala ókilderin qoldaý jalǵasa beredi. 

«Elimizde aýyl sharýashylyǵy salasyn damytý basym baǵyttardyń biri bolyp otyr. Óıtkeni, bul sala – el halqynyń ómir súrý sapasyna tikeleı áser etetin el ekonomıkasynyń negizgi baǵyttarynyń biri. Sala qyzmetkerleri keń baıtaq Otanymyz ben ár óńirdiń azyq-túlik qaýipsizdigin qamtamasyz etýde sarqylmaıtyn eńbeksúıgishtiktiń úlgisin kórsetip keledi», - dedi Serik Shápkenov.

Prezıdent Jarlyǵymen aýyl sharýashylyǵy salasyn damytýǵa qosqan eleýli úlesi úshin «Parasat» ordenimen eńbek ardageri Elemes Abdoshev marapattaldy. «Qurmet» ordenine «Nurly dala» sharýa qojalyǵynyń jetekshisi Murataı Sarmanov, al, «Eren eńbegi úshin» medaline «Aşysaı» jáne «Jan» sharýa qojalyqtarynyń jetekshileri Baqtyǵalı Jıenqulov pen Jumajan Jakın, «Dastan» sharýa qojalyǵynyń mehanızatory Ǵarıfolla Mustafın ıe boldy. 

Sondaı-aq, Jylyoı aýdanyndaǵy Jem aýyldyq okrýginiń ákimi Nurtas Qýatbaev, «Talapker», «Alǵaıazov» sharýa qojalyqtarynyń jetekshileri Qısmetolla Járdemov pen Orazǵalı Alǵaıazov, Jylyoı aýdandyq veterınarlyq stansasy dırektorynyń orynbasary Baqtybaı Nurjanov, «Nurly dala» agrofermasynyń qyzmetkeri Erlan Bısenǵalıev «Aýyl sharýashylyǵy salasynyń úzdigi» atandy.

Taǵy bir top qyzmetkerge Aýyl sharýashylyǵy mınıstriniń Qurmet gramotasy tapsyryldy. 
Eske sala ketelik, budan buryn Aqtóbe oblysynda aýyl sharýashylyǵy eńbekkerleri marapattalǵany habarlanǵan edi.