Atyraýda máslıhat depýtattyǵyna 432 azamat usynyldy
ATYRAÝ. KAZINFORM — Atyraý oblysynda máslıhat depýtattyǵyna birmandattyq saılaý okrýgteri boıynsha 386 kandıdat usynyldy. Al oblystyq máslıhattaǵy partııalyq tizim arqyly bólinetin 15 mandatqa alty saıası partııa 46 kandıdat usyndy.
Jalpy óńirdegi oblystyq, qalalyq jáne aýdandyq máslıhattarda 140 depýtattyq mandat bar. Onyń 30-y oblystyq máslıhatqa, 25-i Atyraý qalalyq máslıhatyna, al qalǵan 85-i jeti aýdannyń máslıhattaryna tıesili.
Birmandattyq saılaý okrýgteri boıynsha kandıdattardy usyný kezeńinde 403 adam usynylǵan. Onyń 146-sy ózin-ózi usynsa, 257-si saıası partııalar atynan usynylǵan. Keıin 17 adam jeke ótinishine sáıkes kandıdat bolýdan bas tartqan. Osylaısha, 27 qazanda aıaqtalǵan usyný kezeńiniń qorytyndysy boıynsha 386 kandıdat qalǵan.
Oblystyq máslıhattaǵy 15 mandatqa alty saıası partııa partııalyq tizimderin usyndy. «Aýyl» partııasynan — 4, «Aq joldan» — 7, Respublica-dan — 6, Qazaqstan Halyq partııasynan — 2, «Baıtaqtan» — 3 jáne «Ádilet» partııasynan 24 kandıdat bar. Barlyǵy — 46 kandıdat. Zańnamaǵa sáıkes, partııalyq tizimdegi áıelder men jastardyń úlesi keminde 30 paıyz bolýy kerek. Komıssııa málimetinshe, bul talap barlyq partııanyń tiziminde saqtalǵan.
Azamattardy usyný merzimi 27 qazan kúni aıaqtaldy. Kandıdattardy tirkeý bekitilgen josparǵa sáıkes 1 qarasha saǵat 18:00–ge deıin jalǵasady. Atyraý oblystyq aýmaqtyq saılaý komıssııasynyń tóraǵasy Ásııa Qystaýbaevanyń aıtýynsha, tirkeý kezinde úmitkerlerdiń zańda belgilengen talaptarǵa sáıkestigi tekseriledi. Sondaı-aq tirkeýge deıin ár úmitker saılaý jarnasyn, ıaǵnı 425 myń teńge tóleýi kerek.
— Saılaý jarnasy kandıdat saılanǵan jaǵdaıda nemese saılaý qorytyndysy boıynsha keminde 5 paıyz daýys jınasa, sondaı-aq saılaý kúnine deıin qaıtys bolǵan jaǵdaıda, al partııalyq tizim boıynsha keminde 5 paıyz daýys jınalǵan jaǵdaıda jarna saıası partııaǵa qaıtarylady. Partııalyq tizimmen usynylǵan kandıdattardyń jarnasyn saıası partııa, al birmandattyq okrýg boıynsha usynylǵan kandıdattar óz qarajatynan tóleıdi, — dedi Ásııa Qystaýbaeva.
Saıası naýqan kezinde óńirde 9 aýmaqtyq, 87 okrýgtik jáne 278 ýchaskelik saılaý komıssııasy jumys isteıdi. Olardyń quramynda 2,5 myńnan astam múshe bar. Ýchaskelik saılaý komıssııalary daýys berý kúnine 20 kún qalǵanda jumysyn bastaıdy.
1 qazandaǵy málimet boıynsha, Atyraý oblysynda 426 237 saılaýshy bar. Qazirgi ýaqytta jergilikti atqarýshy organdar tizimderdi naqtylaý jumysyn júrgizip jatyr.
Aıta keteıik, Qazaqstanda máslıhat depýtattarynyń kezekten tys saılaýynda 12 mıllıonnan astam azamat daýys bere alady.
