Atyraýda mas kúıde kólik aıdaǵan mektep dırektory qyzmetinen ketti
ATYRAÝ. KAZINFORM — Atyraý oblysy Inder aýdanyndaǵy mektepterdiń birinde dırektordyń mindetin atqarýshy bolǵan azamat mas kúıinde kólik júrgizgeni úshin ákimshilik jaýapkershilikke tartylyp, laýazymynan aıyryldy.
Zańbuzýshylyq 10 mamyr kúni saǵat 21:10 shamasynda bolǵan. Sot taratqan aqparatqa súıensek, «Toyota Camry» markaly kólik quralyn toqtatý kezinde azamat tekserý barysynda polıtsııa qyzmetkeriniń zańmen belgilengen tártipke sáıkes, alkogoldik, esirtkilik nemese ýytqumarlyq masań kúıin medıtsınalyq kýálandyrýdan ótý týraly zańdy talabyn oryndaýdan bas tartqan.
— Ol ÁQBtK-niń 613-babynyń 4-bóligimen kináli dep tanyp, oǵan 15 táýlik merzimge ákimshilik qamaqqa alý jáne 8 jyl merzimge kólik quralyn basqarý quqyǵynan aıyrý túrindegi ákimshilik jaza qoldanyldy. Sot qaýlysy zańdy kúshine endi, — dep habarlady Atyraý qalasynyń ákimshilik quqyqbuzýshylyqtar jónindegi mamandandyrylǵan soty.
Atyraý oblystyq bilim berý basqarmasynyń aqparatyna súıensek, 1990 jyly týǵan azamat mektep dırektorynyń mindetin atqarýshy bolyp 2026 jyldyń maýsym aıyna deıin alty aı merzimge taǵaıyndalǵan. Osy jaǵdaıdan keıin ol basshylyq qyzmetten bosatylǵan.
Buǵan deıin Aqtóbede eki kúnde 1300-den astam jol erejesin buzǵandar anyqtalǵanyn jazǵan edik.
