Atyraýda mas er adam óz úıin jarmaq bolǵan

Atyraýda mas er adam óz úıin jarmaq bolǵan. Tekserý kezinde sot qaýlysymen oǵan 1 jyl merzimge erekshe talap ornatý belgilengeni anyqtaldy, dep habarlaıdy Kazinform.

Oblystyq polıtsııa departamenti baspasóz qyzmetiniń málimetine súıensek, oqıǵa 15 qarashada túngi saǵat 22:09-da shaqyrtý túsken.

– Atyraý qalasynyń turǵyny №1 qalalyq polıtsııa bólimine Azattyq dańǵylyndaǵy turǵyn úı páteriniń birinde otbasylyq janjal jóninde habar bergen. Tekserý barysynda 1979 jylǵy er adam polıtsııa qyzmetkerlerine qarsylyq bildirgen. Sol kezde ol mas kúıde bolǵan. Páteriniń esigin ishinen qulyptap, gaz jiberip, úıdi jaryp jiberetinin aıtqan. Onyń 48 jastaǵy áıeli men balasy úıden shyǵyp ketken. Oqıǵa ornyna «AtyraýGazAımaq» AQ-nyń, tótenshe jaǵdaılar departamentiniń jáne jedel-járdem brıgadasynyń qyzmetkerleri shaqyryldy. Mas er adam polıtsııa qyzmetkerleriniń talabyna baǵynbaı, páterdiń terezesinen shatyrǵa qashyp shyqqan. Ol sol jerden ustaldy, -dep habarlady departamenttiń baspasóz qyzmeti.

Qazir atalǵan er adamǵa qatysty QR Ákimshilik quqyq buzýshylyq týraly kodeksiniń 73-baby (Otbasy-turmystyq qatynastar aıasyndaǵy quqyqqa qarsy áreketter), 438-baby (Arnaýly qyzmetterdi kórineý jalǵan shaqyrý), 667-baby (Quqyq qorǵaý organy nemese arnaýly memlekettik organ, áskerı polıtsııa organy, memlekettik feldegerlik qyzmet qyzmetkeriniń (áskerı qyzmetshisiniń), sot prıstavynyń, sot oryndaýshysynyń zańdy ókimine nemese talabyna baǵynbaý) jáne 669-babymen (Sot úkimin, sot sheshimin nemese ózge de sot aktisin jáne atqarýshylyq qujatty oryndamaý) boıynsha ákimshilik hattama toltyryldy. Jjınaqtalǵan is qujattary sotqa joldandy.

Belgili bolǵandaı, 1979 jylǵy azamatqa qatysty bıylǵy 5 qarashada sot qaýlysymen 1 jyl merzimge erekshe talap belgileý taǵaıyndalǵan.

Eske sala ketelik, budan buryn Atyraýlyq turǵynnan bekire, atys qarýy, marıhýana tárkilengenin jazǵan edik.