Atyraýda maldyń qyrylýyna qandaı aýrý sebep bolǵany anyqtaldy
ATYRAÝ. KAZINFORM — Atyraý qalasynyń irgesindegi Keńózek aýyldyq okrýginde maldyń qyrylýyna anaerobty enterotoksemııa sebep bolǵan. Bıyl bul aýrýdan 11 bas iri qara ólgen.
Atyraý oblystyq aýyl sharýashylyǵy jáne jer qatynastary basqarmasynyń aqparatyna súıensek, ólgen 11 bas mal boıynsha tıisti aktiler jasalǵan.
Anaerobty enterotoksemııa — Clostridium bakterııalarynyń toksınderi áserinen asqazan-ishek jolynda damıtyn, jiti ótetin juqpaly aýrý. Aýrý kóbine qoı-eshkige, ásirese qozy men laqtarǵa, sondaı-aq buzaýlar men toqtylarǵa tán. Keı jaǵdaıda iri qara da shaldyǵýy múmkin. Aýrýdyń negizgi qozdyrǵyshy — Clostridium perfringens bakterııasynyń ártúrli tıpi.
Aýrý óte jyldam órbýimen sıpattalady. Maldyń álsizdigi, tábetiniń tómendeýi, ish ótýi, ishiniń kebýi jáne aýyrýy baıqalýy múmkin. Keı jaǵdaıda nájiste qan bolýy, júıke júıesiniń buzylýy, tyrysý sııaqty belgiler tirkeledi. Aýrý tez órshigen jaǵdaıda mal kenetten ólip qalýy múmkin. Keıde aýrýdyń syrtqy belgileri baıqalmaı, mal birden óledi.
— Oblystyq aýmaqtyq ınspektsııa karantındik shekteý qoıǵan joq, qazirgi tańda qoralarda dezınfektsııalyq jumys júrgizildi, — dep málimdedi basqarmanyń baspasóz qyzmeti.
Basqarmanyń habarlaýynsha, qazir jańa mal ólimi tirkelmegen. Aýyrǵan maldyń barlyǵy emdelgen.
Buǵan deıin Keńózek turǵyndary belgisiz sebepten 20-ǵa jýyq iri qaranyń ólgenin málimdegen edi.
