Atyraýda mal shyǵyny tirkelgen aýdanǵa taǵy 45 tonna jem jetkizildi
ATYRAÝ. KAZINFORM — Atyraý oblysy Isataı aýdany Tuşyqudyq aýylyna Oral qalasynan 45 tonna jem ákelindi. Basty maqsat — aýdan aýmaǵyndaǵy mal basyn qystan aman alyp shyǵý.
Bul — kebek emes, tartylǵan aq bıdaı jemi. Bir kelisi 104 teńgeden satylymǵa shyǵaryldy, ıaǵnı, bir qaby 2600 teńgeden satylyp jatyr.
Aýdandyq kásipkerlik jáne aýyl sharýashylyǵy bóliminiń basshysy Dıdar Esmuhanovtyń aıtýynsha, bul baǵa naryqtan arzan. Óıtkeni, jemdi jetkizý jumystaryna, ıaǵnı tehnıkaǵa jáne oǵan qajetti janar-jaǵarmaıǵa aýdanda jumys isteıtin kásipkerler men iri kompanııalar demeýshilik kórsetken. Mundaı jumys aldaǵy aptalarda aýdannyń ózge de aýyldarynda jalǵasady.
Aıta keteıik, Tuşyqudyq aýyldyq okrýgi boıynsha 127 sharýa qojalyǵy, 357 jeke turǵyndar mal sharýashylyǵymen aınalysady.
Esterińizge salaıyq, ótken aptada mundaı jumys Isataı aýdanyna qarasty Qamysqala aýyldyq okrýginde uıymdastyrylǵan edi. Oraldan 39 tonna jem jetkizildi.
Sebebi, qańtarda jaýǵan jańbyr qarǵa ulasyp, jer betinde muzdaqtyń paıda bolyp, túzde jaıǵan túlikke qıyn soqty. Saldarynan 50-den asa jylqy óldi.