Atyraýda mal men et ónimderin qujatsyz satqandarǵa 5 mln teńge aıyppul salyndy
ATYRAÝ. KAZINFORM – Atyraý oblysynda 134 adamnyń mal men et ónimderin qujatsyz tasymaldap, satqany anyqtaldy. Olarǵa salynǵan aıyppul kólemi 5 mln teńgeden asty.

Atyraý oblystyq polıtsııa departamentiniń baspasóz qyzmetinen málim etkendeı, «Mal urysy» jedel-profılaktıkalyq is-sharasy kezinde zańdylyqty buzǵandarǵa ákimshilik hattama toltyrylǵan.
– Jedel-profılaktıkalyq is-shara aıasynda mal jáne et ónimderin tasymaldaıtyn 2099 avtokólik, et ónimderin satatyn 650 oryn, 642 sharýa qojalyǵy tekserildi. Shalǵaıdaǵy ýchaskelerdi, qystaqtar men ujymdyq sharýa qojalyqtarynda turǵyndarǵa azamattyq, qyzmettik qarý men oq-dárilerin satyp alý, saqtaý, paıdalaný jáne tasymaldaý bóligin buzǵany úshin QR Ákimshilik quqyq buzýshylyq týraly kodeksiniń 484-babymen 32 ákimshilik hattama toltyryldy. Mal men et ónimderin qujatsyz tasymaldaýǵa qatysty 111, al mal men et ónimderin qujatsyz satýǵa baılanysty 23 derek anyqtaldy. Zań talabyn buzǵan 134 adamǵa QR Ákimshilik quqyq buzýshylyq týraly kodeksiniń 406-babyna sáıkes 5 mln teńgeden astam aıyppul salyndy, - dep habarlady departamenttiń baspasóz qyzmeti.
Sondaı-aq atalǵan is-shara barysynda tórt túlikti ıeleriniń nemese olar ýákilettik bergen adamdardyń qadaǵalaýynsyz jaıýdyń 352 deregi anyqtalǵan.
Eske sala ketelik, budan buryn Atyraýdaǵy Jylyoı aýdany sharýalaryna tórt túlikti qaýipsiz aýmaqqa shyǵarý eskertilgenin jazǵan edik.