Atyraýda mal qyrylǵan aýdanǵa Oraldan jem jetkizildi
ATYRAÝ. KAZINFORM — Qańtarda jaýǵan jańbyr qarǵa ulasyp, jer betinde muzdaqtyń paıda bolýy Atyraý oblysy Isataı aýdanynda túzde jaıylǵan túlikke qıyn soqqan edi. Saldarynan mal shyǵyny boldy. Osy jaǵdaıdan keıin aýdan ákimdigi sharýalardy qoldaý maqsatynda BQO-nan jem jetkizý jumysyn uıymdastyrdy.
Sharýalardyń aıtýynsha, qysty shyǵynsyz eńserýdiń basty sharty — jetkilikti ári sapaly mal azyǵy. Alaıda sońǵy jyldary jem-shópke beriletin sýbsıdııanyń toqtatylýy, shóp pen jem baǵasynyń kúrt qymbattaýy usaq jáne orta sharýashylyqtarǵa aıtarlyqtaı salmaq túsirip otyr.
Búgin Qamysqala aýyldyq okrýgine Oral qalasynan 39 tonna mal azyǵy jetkizildi. Bul — kebek emes, tartylǵan aq bıdaı jemi. Bir kelisi 104 teńgeden satylymǵa shyǵaryldy. Jemdi jetkizý jumystaryna, ıaǵnı tehnıkaǵa jáne oǵan qajetti janar-jaǵarmaıǵa aýdanda jumys isteıtin kompanııalar demeýshilik kórsetti.
Qamysqala aýyldyq okrýginde 728 otbasy bar. Onyń 204-i mal baǵyp otyr. Sondaı-aq okrýgte 70 sharýa qojalyǵy tirkelgen. Aýyl ákimi Rafıǵat Tajıdenovanyń aıtýynsha, jem bárine teńdeı jetýi úshin sharýa qojalyqtaryna 20, al turǵyndarǵa 5–10 qaptan satylyp jatyr.
— Qazirgi tańda kebek jemniń baǵasy 120–130 teńge aralyǵynda. Al onyń qunarlylyǵy aq bıdaı jemine qaraǵanda tómen. Sondyqtan jetkizilgen jem ári tıimdi, ári qoljetimdi. Ár qaby 25 kılogramm tartatyn tartylǵan bıdaıdyń bir kılogramy 104 teńge, ıaǵnı bir qaby 2600 teńgeden satylyp jatyr. Tańerteń jetkizilgen jem tústen keıin de satylyp jatyr, turǵyndar kezekpen alyp jatyr, — deıdi aýyl ákimi Rafıǵat Tajıdenova .
Jetkizilgen jem qory Qamysqalamen qatar Tuşyqudyq jáne Aqqystaý aýyldyq okrýgteriniń turǵyndaryna da satylady.Sonymen qatar, jem-shóp baǵasynyń negizsiz ósýine jol bermeý maqsatynda tıisti baqylaý jumystary júrgizilip otyr.
— Halyq qınalǵan, qys qyspaǵy kúsheıgen ýaqytta arzan baǵada mal azyǵyn jetkizip, qoldaý kórsetken aýdan jáne aýyl ákimdikterine alǵysymyz zor. Ásirese, jylqy maly úshin bıylǵy qys aýyr tıdi. Buǵan deıin bazardan jáne jeke adamdardan 18 keli kebekti 2600 teńgeden satyp alyp júrgen edik. Búgingi kórsetilgen kómek kópke demeý bolyp, jyrtyqty jamaǵandaı boldy. Osyndaı qoldaý aldaǵy ýaqytta da jalǵasyn tapsa eken, — deıdi sharýa Qalıdolla Qadırov.
Eske salaıyq, osyǵan deıin Atyraý oblysy Isataı aýdanyna qarasty Qamysqala aýylynda 50-den asa jylqy ólip qalǵanyn jazǵan edik.