Atyraýda mádenıet úıiniń qurylysyn júrgizetin merdiger úshinshi ret aýysty

ATYRAÝ. KAZINFORM – Atyraý oblysynyń Muqyr aýylyndaǵy mádenıet úıiniń qurylysy áli bitpeı tur. Byltyrǵy shilde nysan qurylysyn júrgizý úshin úshinshi merdigermen shart jasalǵan. 

Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń birinshi orynbasary Nurlan Jahınniń aıtýynsha, Muqyr aýylyndaǵy mádenıet úıiniń qurylysy baqylaýǵa alynǵan.

— «Zań men tártip» qaǵıdatyn iske asyrý, mańyzdy áleýmettik nysandardyń qurylysynyń ýaqtyly aıaqtalýyn baqylaý maqsatynda monıtorıng júrgizildi. Máselen, Qyzylqoǵa aýdanynyń Muqyr aýyldyq okrýginde 400 oryndyq mádenıet úıiniń qurylysy 2020 jyly bastaldy. Buryn qurylysqa 2 merdiger tartyldy. Alaıda ekeýi de jumysty merziminde tapsyra almady. Atalǵan nysannyń problemasy birinshi merdigerdiń shartta kózdelgen mindetterdi tıisti deńgeıde oryndamaı, qarjylyq problemalarǵa baılanysty qurylysty tastap ketýine baılanysty týyndady. Al ekinshi merdigermen jasalǵan sharttyń zańdylyǵy turǵysynan sot protsesi júrgizilip jatyr, — dep habarlady Nurlan Jahın.

Onyń deregine qaraǵanda, atalǵan nysan jobasyna túzetýler engizilip, 2024 jyldyń 5 shildesi jańa merdiger — «Jıenbaı» JShS-men memlekettik satyp alý sharty jasalǵan.

— Strategııalyq mańyzdy nysandardyń qurylysy uzaqqa sozylǵan protseske aınalmaýy kerek. Biz jobalardy iske asyrýdy jedeldetý, ýaqtyly paıdalanýǵa berilýin qamtamasyz etý úshin keshendi sharalar qabyldap jatyrmyz. Bıýdjet qarajatyn tıimdi paıdalanýǵa erekshe nazar aýdaramyz, — deıdi Nurlan Jahın.

Qazir mádenıet úıi qurylysynyń 27 paıyzy ǵana oryndalǵan. Osy kezge deıin baǵanalardy quıý aıaqtalǵan. Endi eden plıtasynyń qalyptaryn montajdaý júrip jatyr.

Eske sala ketelik, budan buryn Atyraýda 72 mlrd teńge bólingen nysandar qurylysy merziminen nege keshiktirilgenin habarlaǵan edik.