Atyraýda lotos maýsymy bastaldy: ázirge gúl sırek
ATYRAÝ.KAZINFORM – Atyraý oblysy Qurmanǵazy aýdanyndaǵy Qıǵash ózeninde lotos gúldep bastady. Degenmen gúl sany ádettegiden óte az.
Jalpy lotos jyl saıyn shilde aıynyń ortasy men tamyz ortasyna deıin gúldeıdi. Qazirgi ýaqytta alqaptaǵy gúl sany ótken jyldarmen salystyrǵanda óte az. Basym bóliginde japyraqtary ǵana sý betinde jaıqalyp tur.
Lotos alqabyna jetý úshin aldymen aýdanǵa qarasty Teńiz aýylyna baryp, odan ári jaldamaly qaıyqpen ózen arnalary arqyly júrý qajet. Jol boıynda sý lalagúlderi jaıqalyp, aqquıryq sýbúrkiti, kishkentaı geron, sý quzǵyny sııaqty qustardy kórýge bolady.
Qaıyqpen jetý úshin ár adam 5-7 myń teńge aralyǵynda jolaqy tóleýi tıis. Baǵa qaıyqtyń syıymdylyǵy men qýatyna baılanysty.
Qıǵash ózenindegi qyzǵylt lotos – Qazaqstandaǵy sırek kezdesetin ósimdikterdiń biri. Sondyqtan ony julýǵa tyıym salynǵan. Bıiktigi 150 santımetrge deıin jetetin bul gúl kóp halyqtyń mádenıetinde tazalyqtyń sımvoly sanalady.
Byltyr osy gúldi nasıhattap, aýdannyń týrıstik áleýetin kórsetýge baǵyttalǵan Lotos festıvali uıymdastyryldy. Іs-shara bir aıǵa sozylǵan edi. Bıyl da ótkizý josparlanyp otyr.
- Festıvaldi 15-16 tamyzda bastalady. 1 aptaǵa sozylady degen jospar bar. Іs-shara aıasynda merekelik kontsert, sporttyq jarystar bolady, - dep pikir bildirdi Teńiz aýyldyq okrýginiń ákimi Muzafar Muradym.
Aýdan ákimdiginiń málimetinshe, lotos alqaptarynyń ınfraqurylymyn keńeıtý jumystaryn jandandyrý boıynsha is-shara jospary jasaqtalyp jatyr. Aıta keteıik, ózen jaǵasynda 6 týrıstik demalys orny jumys isteıdi.
Buǵan deıin Atyraý týrızminiń álsiz tustary qandaı ekenin jazǵan edik.
