Atyraýda lotos gúldeıtin taǵy bir tabıǵı aýmaq paıda boldy
ATYRAÝ. KAZINFORM — Atyraý qalasyna qarasty Tasqala eldimekeniniń mańyndaǵy Peretaska ózegi boıynan Qazaqstannyń Qyzyl kitabyna engen lotostyń tabıǵı jaǵdaıda ósetin jańa ósý aımaǵy anyqtaldy.
«Aqjaıyq» memlekettik tabıǵı rezervatynyń Ǵylym jáne monıtorıng bóliminiń mamandary júrgizgen zertteý barysynda lotostyń gúldeý kezeńine jetkeni tirkeldi.
Mamandardyń málimetinshe, ósimdiktiń taralý aımaǵy rezervattyń sol jaq klasterinen shamamen 3-4 shaqyrym qashyqtyqta ornalasqan Peretaska ózegi boıynan anyqtalǵan. Zertteý aıasynda jańa ósý aýmaǵyna ekologııalyq baǵalaý júrgizilip, fotoqujattaý jumysy júrgizilgen.
Rezervat qyzmetkerleriniń pikirinshe, Qyzyl kitapqa engizilgen ósimdiktiń tabıǵı jaǵdaıda jańa aýmaqta kezdesýi óńirdegi bıoalýantúrliliktiń saqtalǵanyn kórsetedi.
Buǵan deıin Atyraý oblysy Qurmanǵazy aýdanyndaǵy Qıǵash ózeninde lotos gúldeı bastaǵanyn jazdyq. Degenmen gúl sany ádettegiden óte az.
