Atyraýda lıft qulap, úsh adam aýrýhanaǵa jetkizildi
ATYRAÝ. KAZINFORM — Atyraýdaǵy turǵyn úı keshenderiniń birinde lıft úshinshi qabattan avarııalyq jaǵdaıda tómen túsip ketken. Oqıǵa kezinde onyń ishinde tórt adam bolǵan.
Atyraý qalalyq ákimdigi taratqan aqparatqa súıensek, bul jaǵdaı 5 qazanda Qulmanov kóshesi, 1B mekenjaıyndaǵy «Grand Atyraý» turǵyn úı kesheniniń «B» blogynda bolǵan.
Avarııalyq jaǵdaı kezinde lıftte tórt turǵyn bolǵan. Úsh adam jedel járdem brıgadasymen medıtsınalyq tekserýden ótý úshin aýrýhanaǵa jetkizildi. Aldyn ala málimet boıynsha, olardyń jaǵdaıy qanaǵattanarlyq. Taǵy bir turǵyn medıtsınalyq kómekten bas tartqan.
— Oqıǵadan keıin Atyraý qalasynyń ákimi Danııar Tahanov turǵyn úı keshenine baryp, jaǵdaımen tanysty. Qala ákimi turǵyndarmen jáne jaýapty qyzmet ókilderimen sóılesip, oqıǵanyń mán-jaıyn tikeleı baqylaýyna aldy. Jaýapty qyzmetterge lıftiniń avarııalyq tómen túsýine ne sebep bolǵanyn shuǵyl anyqtaý tapsyryldy. Sonymen qatar qaladaǵy barlyq lıftilerdiń tehnıkalyq jaǵdaıyn tolyq tekserip, qaýipsizdik deńgeıin baǵalaý jóninde tapsyrma berildi, — dep habarlady ákimdiktiń baspasóz qyzmeti.
Qazir oqıǵanyń naqty sebepteri anyqtalyp jatyr.
Jalpy oblys ortalyǵynda 179 kópqabatty turǵyn úıde barlyǵy 570-ke jýyq jedelsaty bar. Onyń 67-sin jóndeý josparlanyp otyr. Byltyr bul jumysty isteýge qazynadan qarjy bólinbeı qalǵan edi.
Atyraý qalalyq TÚKSh jáne turǵyn úı ınspektsııasynyń málimetinshe, 2012 jáne 2024 jyldary qala aýmaǵy boıynsha 30 turǵyn úıdegi 59 lıfti aýystyryldy.
