Atyraýda Quryltaı depýtattarynyń saılaýyna oraı eki jańa ýchaske quryldy
ATYRAÝ. KAZINFORM – Atyraý oblysynda 23 tamyzǵa belgilengen Qazaqstan Respýblıkasy Quryltaı depýtattarynyń saılaýyna daıyndyq aıasynda vahtalyq ádispen jumys isteıtin kásiporyndarda eki jańa saılaý ýchaskesi quryldy. Qazirgi ýaqytta daıyndyq jumystary Qazaqstan Respýblıkasy Ortalyq saılaý komıssııasy bekitken kúntizbelik josparǵa sáıkes júrgizilip jatyr.
Atyraý oblystyq aýmaqtyq saılaý komıssııasynyń málimetinshe, saılaýdy óńirde quramynda 2101 adam bar 9 aýmaqtyq jáne 278 ýchaskelik saılaý komıssııasy uıymdastyrady. Saılaý týraly Konstıtýtsııalyq zańnyń «Saılaý ýchaskelerin qurý» týraly 23-babyna engizilgen ózgeristerge sáıkes, endi saılaý ýchaskelerin úzdiksiz jumys isteıtin jáne vahtalyq ádispen eńbek etetin kásiporyndarda qurýǵa múmkindik berilgen.
- Osyǵan baılanysty Atyraý qalasynda jáne Jylyoı aýdanynda eki jańa saılaý ýchaskesi ashyldy. Onyń biri – NCOC kompanııasynyń «Bolashaq» munaı men gazdy keshendi daıyndaý zaýytynda, ekinshisi – Prorva ken ornyndaǵy «Kaspıı samaly» vahtalyq qalashyǵynda ornalasqan,- dedi Atyraý oblystyq aýmaqtyq saılaý komıssııasynyń tóraǵasy Ásııa Qystaýbaeva.
Qazirgi kezde jergilikti atqarýshy organdar saılaýshylar tizimin naqtylap jatyr. 9 shildedegi málimet boıynsha Atyraý oblysynda 426 myńǵa jýyq saılaýshy tirkelgen.
Saılaý týraly zańnamaǵa sáıkes eger saılaýshy daýys berý kúni ózi turaqty tirkelgen mekenjaıynda bolmaıtynyn bilse, ol daýys berý kúnine 30 kún qalǵanda ózi bolatyn aýmaqtaǵy ákimdikke ótinishin berip, sol jerdiń saılaýshylar tizimine tirkelýge quqyly. ıAǵnı basqa oblysqa ketetin saılaýshylar 23 shildege deıin óz ótinishin joldap, sol oblystyń saılaýshylar tizimine engiziledi. Tıisti ákimdik saılaýshyny tizimge engizip, turaqty tirkelgen tizimnen daýys berý kúni alyp tastaýdy uıymdastyrady.
- Al bul merzimnen keshikken azamattar 7 tamyzdan bastap 22 tamyz saǵat 18:00-ge deıin turaqty tirkelgen saılaý ýchaskesinen esepten shyǵarý kýáligin alyp, basqa óńirde daýys berý múmkindigine ıe bolady. Esepten shyǵarý kýáligin senimhat arqyly alýǵa bolady jáne mundaı senimhatty notarıatta kýálandyrý talap etilmeıdi. Degenmen joǵalǵan esepten shyǵarý kýáliginiń telnusqasy berilmeıdi,-dep tolyqtyrdy Atyraý oblystyq aýmaqtyq saılaý komıssııasynyń tóraǵasy Ásııa Qystaýbaeva.
Sondaı-aq óńirde saılaýshylarǵa aqparattyq qoldaý kórsetý úshin 10 call-ortalyq iske qosyldy. Budan bólek, búginnen bastap Telegram-bot jumysyn bastaıdy. Ol arqyly azamattar ózderiniń tirkelgen saılaý ýchaskesi, daýys berý tártibi jáne saılaý naýqanyna qatysty ózge de málimetti ala alady.
Buǵan deıin Batys Qazaqstanda Quryltaı saılaýyna oraı 2 myńǵa jýyq jas saılaýshy qosylatynyn jazǵan edik.
