Atyraýda qurylysta zańsyz jumys istegen 100 sheteldik anyqtaldy
ATYRAÝ. KAZINFORM – Atyraýda kóshi-qon zańnamasyn buzǵan 222 shetel azamaty anyqtalyp, ákimshilik jaýapkershilikke tartyldy. Sondaı-aq qurylysta 100 sheteldiktiń zańsyz eńbek etip júrgeni belgili boldy.
12-16 qazan aralyǵynda el aýmaǵynda «Zańsyz kelýshi» respýblıkalyq jedel-profılaktıkalyq sharasy ótip jatyr. Polıtsııa qyzmetkerleri shetel azamattarynyń Qazaqstan aýmaǵynda bolý tártibin, tirkeý talaptarynyń saqtalýyn jáne eńbek qyzmetiniń zańdylyǵyn tekserip jatyr.
Eki kún ishinde óńirde kóshi-qon zańnamasyn buzǵan 222 shetel azamaty anyqtaldy. Olardyń barlyǵy ákimshilik jaýapkershilikke tartylǵan.
Sonymen qatar qurylys nysandarynda júrgizilgen reıd kezinde zańsyz jumys istegen ózge elderdiń 100 azamaty belgili boldy. Olarǵa qatysty materıaldar protsessýaldyq sheshim qabyldaý úshin Atyraý qalalyq sotyna joldanǵan.
Budan bólek, kóshi-qon zańnamasynyń talaptaryn óreskel buzǵan 16 shetel azamaty Qazaqstan aýmaǵynan shyǵaryldy.
Polıtsııa departamenti shetel azamattaryn elde bolý jáne eńbek qyzmetin júzege asyrý tártibin saqtaýǵa shaqyrdy.
Buǵan deıin Óskemende shetel azamaty 59 ret jol erejesin buzǵanyn jazǵan edik.
