Atyraýda qurylysy toqtap qalǵan kontsert zaly buzylyp jatyr
ATYRAÝ. KAZINFORM – Atyraýda birneshe jyl buryn qurylysy toqtap qalǵan eki nysan buzylyp jatyr. Onyń biri – kontsert zaly, al, ekinshisi monsha-saýyqtyrý kesheniniń nysany.
Qurylysy aıaqtalmaı qalǵan nysandardy buzý «ARSM» JShS-ǵa júktelgen. Seriktestik dırektory Abylaıhan Ǵazızovtyń aıtýynsha, bul jumysty qarashada aıaqtaý josparlanǵan.
«Nysandardy buzý kezeń-kezeńimen júrip jatyr. Qazir monsha-saýyqtyrý kesheni ǵımaratynyń 50%-y buzyldy. Al, kontsert zalynyń syrtqy kúmbezi alyndy. Endi joǵarydaǵy metal konstrýktsııasy buzylýda. Budan keıin betondy qabyrǵasyn alý úshin Almaty qalasynan arnaıy mamandar keledi. Óıtkeni, qurylysy birneshe jylǵa toqtap qalǵan ǵımarat bolǵandyqtan, azdaǵan qıyndyq týyndaıdy. Keıin irgetasy alynady. Nysandardy buzýǵa 20-ǵa jýyq adam tartyldy. Jumysty tezdetý úshin 2 kran, 2 júk tıegish, 3 KamAZ ben 2 uzyn tirkemesi bar kólik bólindi», - deıdi Abylaıhan Ǵazızov.
Atyraý óńirlik kommýnıkatsııalar qyzmetiniń málimetinshe, buzylyp jatqan eki nysannyń jer telimi biriktirilip, kireberisi dombyra pishindes jańa ǵımarat salý kózdelgen. Dombyra úlgisindegi ǵımarattyń bir qanatyna – kontsert zaly, al, ekinshi qanatyna tarıhı-ólke taný murajaıy ornalasady. Kontsert zaly 1 200 orynǵa eseptelgen.
Jańa nysannyń jobasyn «Engineering Center Ltd» JShS ázirlep jatyr. Jobalaý jumysy úshinshi toqsanda aıaqtalady.
Eske sala ketelik, budan buryn Atyraýda dombyra pishindes kontsert zalynyń qurylysy bastalatynyn habarlaǵan edik.
