Atyraýda qurylysy 4 jylǵa sozylǵan mektep jańa oqý jylynda ashyla ma
ATYRAÝ. KAZINFORM — Jańa oqý jylynyń bastalýyna sanaýly kún qalsa da, Kóktem-2 yqshamaýdanyndaǵy 600 oryndyq mektepke balalaryn bermek bolǵan ata-analar onyń qashan ashylatynyn naqty bilmeı otyr. 4 jyl salynǵan bilim oshaǵynyń qurylysy aıaqtalǵanymen, nysandy paıdalanýǵa qabyldaý rásimi áli júrip jatyr.
Kóktem-2 yqshamaýdanynda turatyn ata-analardyń aıtýynsha, jańa mekteptiń qurylysy uzaqqa sozylǵan. Al mańaıdaǵy bilim berý uıymdarynda oqýshy sany kóp, keı mektepterde balalar úsh aýysymda bilim alýǵa májbúr.
— Mektep ashylmaıtyn bolsa, ony ashyq aıtsyn. Biz bosqa úmittenip otyrǵymyz kelmeıdi. Balalarymyz qazir úsh aýysymda oqıdy. Jańa mektepke aýystyrǵymyz keledi. Qazir kishkentaılarymyz kórshi yqshamaýdandaǵy ne qala ishindegi bilim ordalaryna barýǵa májbúr. Olardy tasymaldaý, qaýipsizdik máselesi bar. Barlyǵy bizdi alańdatady, — deıdi aýyl turǵyndary.
600 oryndyq mekteptiń qurylysy 2022 jyly bastalǵan. Alǵashqy kezeńde jer asty sýlarynyń kóterilýine baılanysty irgetas quıýǵa múmkindik bolmaǵan. Keıin qurylys barysynda jobalyq-smetalyq qujattamaǵa ózgerister engizilgen.
Atap aıtqanda, syrtqy qabyrǵa qalaý jumystary men materıaldarǵa qatysty sáıkessizdikter anyqtalyp, joba qaıta qaralǵan. Qurylys materıaldarynyń qymbattaýyna baılanysty smetalyq ózgerister de engizilgen. Mektepti zamanaýı talaptarǵa saı jabdyqtaý úshin jobalyq-smetalyq qujattamaǵa qosymsha túzetýler engizilip, tıisti qorytyndy 2025 jyldyń jeltoqsanynda alynǵan.
Qurylys jumystary 2026 jyldyń qańtarynda qaıta jalǵasyp, mamyr aıynda aıaqtalǵan, biraq nysandy paıdalanýǵa berý rásimi áli tolyq aıaqtalmaǵan.
Atyraý oblystyq qurylys, sáýlet jáne qala qurylysy basqarmasy mektep qurylysy tolyq aıaqtalǵanyn málimdedi. Basqarmanyń habarlaýynsha, qazir nysandy 1 qyrkúıekte ashýǵa daıyndaý jumystary júrgizilip jatyr.
Mekteptiń ashylýyna qajetti qujattardy rásimdeý barysynda da kidiris bolǵan.
— Órt qaýipsizdigi talaptaryna sáıkestigi týraly qorytyndy alý úshin qujattar Atyraý oblysy tótenshe jaǵdaılar departamentine jiberilip, birneshe ret keri qaıtarylǵan bolatyn. Búginde sáıkestik týraly qorytyndy tolyqtaı alynyp, qujattar Memlekettik sáýlet-qurylys baqylaýy basqarmasyna tapsyrylyp, qabyldaý jumystary júrgizilip jatyr, — dep habarlady tapsyrys berýshi basqarma.
Bul jobany iske asyrýǵa 5 mlrd 303 mln teńge kóleminde qomaqty qarjy qarastyrylǵan. Oblystyq bilim berý basqarmasy mektep jańa oqý jylynda jumysyn bastaıtynyn málimdedi.
— Kóktem-2 yqshamaýdanynda ornalasqan jalpy bilim beretin № 53 mektep 1 qyrkúıekten jumysyn bastaýǵa tolyq daıyn. Qazir konkýrstyq negizde qyzmetkerlerdi qabyldaý júrip jatyr. Bastaýysh synyptyń muǵalimderi jaqyn mańda ornalasqan bilim ordalarynan aýysyp keledi, -dedi jańa bilim oshaǵynyń dırektory Aınur Qalıeva.
Aıta keteıik, keıingi bes jylda elimizde 1 mln-nan astam oqýshy ornyna arnalǵan 1120 mektep salyndy.
