Atyraýda qurylys basqarmasy basshysynyń orynbasary ustaldy

ATYRAÝ.KAZINFORM - Atyraý oblystyq qurylys, sáýlet jáne qala qurylysy basqarmasy basshysynyń orynbasary ustaldy.

Kazinform agenttiginiń quqyq qorǵaý organdaryndaǵy derekkózderiniń málimetinshe, 33 jastaǵy Talǵat Bısen issapardan oralǵan sátte oblys ákimdigi ǵımaratynda ustalǵan.

Belgili bolǵandaı, sheneýnik merdiger kompanııa basshysynan para aldy degen kúdikke ilindi. Bul derekke qatysty qylmystyq is qozǵalyp, merdiger uıymnyń keńsesinde jáne ákimdik ǵımaratynda tintý júrgizilgen.

Qazirgi ýaqytta Talǵat Bısen qolhatpen bosatylǵan. Alaıda tergeý organdary ony qamaýǵa alý jóninde sotqa ótinish túsirýdi josparlap otyr.

Qylmystyq istiń tergeýi jalǵasyp jatyr.

Buǵan deıin halyqaralyq izdeýde júrgen kúdikti Grýzııada ustalǵanyn jazǵanbyz.