Atyraýda qurban shalýǵa arnalǵan oryndar belgili boldy
ATYRAÝ. KAZINFORM — Qurban aıt merekesine oraı Atyraý oblysynda arnaıy mal soıý oryndary uıymdastyrylady. Bul týraly Imanǵalı ortalyq meshiti habarlady.
Meshit usynǵan málimetke sáıkes, turǵyndar tómendegi qasaphanalar men mal soıý oryndaryna bara alady.
Atyraý qalasynda:
— Imanǵalı ortalyq meshiti qasaphanasy;
— «Adal mal» bazary;
— «Asyl Agro» mal bazary;
— Quspan molla meshiti qasaphanasy;
— Q.Muńaıtpasov meshiti qasaphanasy.
Jylyoı aýdanynda:
— Qulsary qalasy, 4 aýyldaǵy «IP Oralsha» mal soıý orny;
— «IP Sısenkýlova» janyndaǵy «Sáken» mal soıý pýnkti.
Inder aýdanynda:
— Inder–Qarabaý tas joly boıyndaǵy №10 ýchaskede ornalasqan IP Mendeshov mal soıý orny.
Sonymen qatar Qurban aıt kúnderi oblystyń ózge aýdandaryndaǵy meshitter janyndaǵy qasaphanalarda da qurbandyq shalý rásimi uıymdastyrylady.
- Óńirdegi barlyq meshitte aıt namazy oqylyp, meshit aýlalarynda kıiz úıler tigilip, merekelik is-sharalar ótedi. Sondaı-aq áleýmettik az qamtylǵan jáne kópbalaly otbasylardyń balalaryna erekshe kóńil bólinip, oblys boıynsha shamamen 15 myń balaǵa aıttyq syılyq taratý josparlanyp otyr, - dep málimdedi Imanǵalı ortalyq meshiti.
Budan bólek, azamattarǵa qolaıly bolý maqsatynda onlaın qurban shalý múmkindigi de qarastyrylǵan. Arnaıy qurban.muftyat.kz saıty arqyly qurban malyna tapsyrys berip, qurbandyq rásimin onlaın ótkizýge bolady.
Meshit málimetinshe, onlaın túrde shalynǵan qurbandyqtyń eti áleýmettik osal toptaǵy otbasylarǵa eriktiler arqyly jetkiziledi.
Aıta keteıik, Atyraýda aıt namazy 06:30-da oqylady.
Buǵan deıin Túrkistan oblysynda 43 arnaıy mal soıý orny belgilengenin jazǵan edik.
