Atyraýda kún energııasyna negizdelgen agrotehnologııalyq park iske qosylady
ASTANA. KAZINFORM — Germanııanyń Mıýnhen qalasynda ótip jatqan kún energetıkasy salasyndaǵy álemdegi eń iri kórme Intersolar Europe 2026 aıasynda S.Ótebaev atyndaǵy Atyraý munaı jáne gaz ýnıversıteti Qytaıdyń jetekshi tehnologııalyq kompanııasy Shanghai Aiko Solar Energy Company Limited (AIKO)-pen ózara túsinistik týraly memorandýmǵa qol qoıdy. Bul týraly Ǵylym jáne joǵary bilim mınıstrligi málim etti.
Qujat Qazaqstan men Qytaı arasyndaǵy jańartylatyn energetıka, jasandy ıntellekt, aýyl sharýashylyǵy jáne ozyq tehnologııalar transferi salalaryndaǵy halyqaralyq yntymaqtastyqty damytýǵa baǵyttalǵan. Qol jetkizilgen kelisimder aıasynda Utebayev University-diń jańa kampýsy bazasynda AIKO-AOGU Zero-Carbon Smart Agriculture Demonstration Park — kómirteksiz «aqyldy» aýyl sharýashylyǵynyń demonstratsııalyq parkin qurý josparlanyp otyr. Bul joba ozyq ınnovatsııalyq sheshimderdi engizýge arnalǵan birlesken ǵylymı-bilim berý jáne tehnologııalyq alańǵa aınalady.
Bul joba Atyraý oblysynyń qýań kontınenttik klımaty men sý qorynyń shekteýliligi jaǵdaıynda aýyl sharýashylyǵyn tıimdi júrgizýdiń ozyq tájirıbesin tanystyratyn ǵylymı-bilim berý jáne tehnologııalyq alań bolmaq. Demonstratsııalyq park aıasynda balamaly energetıka, tsıfrlyq tehnologııalar jáne ınnovatsııalyq agroóndiris salalaryndaǵy zamanaýı sheshimder bir júıege toǵystyrylyp, olardyń tájirıbede qoldanylýy kórsetiledi.
Bolashaq keshende kún energetıkasy, jasandy ıntellekt, resýrstardy tsıfrlyq basqarý júıeleri, sý únemdeý tehnologııalary jáne avtomattandyrylǵan aýyl sharýashylyǵy sheshimderi keńinen qoldanylatyn bolady. Sonymen qatar joba aıasynda turaqty óndiristiń qosymsha baǵyty retinde akvamádenıet salasyn damytý múmkindigi de qarastyrylyp otyr.
— Joba birneshe mańyzdy strategııalyq mindetterdi júzege asyrýǵa baǵyttalǵan, — dep atap ótti ýnıversıtet rektory Gúlzada Shakýlıkova. — Alǵashqy kezeńde kún energııasymen jumys isteıtin jylyjaılar men demonstratsııalyq aýyl sharýashylyǵy alqaptaryn qurý jumysy júrgiziledi. Sondaı-aq ıntellektýaldy sýarý jáne fertıgatsııa júıeleri, sýdy qaıta paıdalaný ınfraqurylymy, kún elektr stantsııalary men energııa saqtaý júıeleri, tsıfrlyq basqarý jáne monıtorıng platformalary iske qosylady. Buǵan qosa AIKO-AOGU birlesken kórme, oqý jáne ǵylymı-zertteý ortalyǵy qurylady.
Joba eń aldymen ýnıversıtettiń ǵalymdary men stýdentteri úshin úlken múmkindikter esigin ashady. Olar halyqaralyq deńgeıdegi zertteýlerge qatysyp, nysandardyń tsıfrlyq egizderi, jasyl sýtegi jáne ekologııalyq trendterdi tájirıbede qoldanýǵa múmkindik alady.
Bul bastama Utebayev University-diń jasyl tehnologııalardy damytý, tsıfrlyq transformatsııany jedeldetý jáne Atyraý qalasyn Ortalyq Azııadaǵy jańa energetıka men turaqty damý salasyndaǵy jetekshi ınnovatsııalyq ortalyqqa aınaldyrý baǵytyndaǵy strategııalyq ustanymyn taǵy bir márte aıqyndap otyr.
Qazaqstan jasandy ıntellekt pen bilim berý salasyndaǵy Hanchjoý bastamasyna qosyldy.
