Atyraýda quqyǵy buzylǵan tutynýshylar 38,9 mln teńgesin qaıtaryp aldy

ATYRAÝ. KAZINFORM - Sapasyz úı jıhazdary. Tigisi sógilgen kıimder. Berilgen baǵdarlamaǵa sáıkes onlaın oqytýdyń ótpeýi. Internet-dúken arqyly alynǵan taýardyń sıpattamasyna saı kelmeýi.  Fıtnes ortalyqqa tólengen aldyn ala abonementtiń paıdalanylmaǵan bóligin qaıtarý. Osy jáne usyǵan uqsas quqyqbuzýshylyqtar Atyraý oblysynda tirkelgen.

Bıyl 11 aıda Atyraý oblystyq saýda jáne tutynýshylardyń quqyǵyn qorǵaý departamentine 1500-ge jýyq ótinish túsken. Bul kórsetkish ótken jylmen salystyrǵanda 33 paıyz artqan. Naqtyraq aıtqanda, osy jyly 848 ótinish qanaǵattandyrylǵan, 462-si boıynsha túsindirme jumysy júrgen. Al 102-si nemese 6,9%-y quzyrly organdarmen birlesip atqarý úshin joldanǵan. Nátıjesinde tutynýshylardyń 38,9 mln teńgesi qorǵaldy.

Departament mamandarynyń sózinshe, taýar men satýshy týraly aqparattyń bolmaýy, taýardyń sıpattamasyna sáıkes kelmeýi, ınternet-saıttardyń taýardy jáne aqshany qaıtarýdan bas tartýy boıynsha tutynýshylardyń quqyǵy jıi bolady.

– Departament tarapynan tutynýshylardyń quqyǵyn buzǵany úshin kásipkerlik sýbektilerin ákimshilik jaýapkershilikke tartý jumysy júrip jatyr. Osyǵan baılanysty, 2025 jyldyń 11 aıyn qorytyndysy boıynsha departament 43 jospardan tys tekserý júrgizdi. Tekserý qorytyndysy boıynsha 15 bıznes sýbektisi jalpy somasy 3,2 mln teńge mólsherinde aıyppul túrindegi ákimshilik jaýapkershilikke tartyldy, - dedi departament basshysynyń orynbasary Jansaıa Dadyn.

Atyraý oblysynyń qoǵamdyq uıymdary 11 aıda 86 túrli ónimdi zerthanalyq saraptamaǵa tapsyrdy, olardyń 63-inen nemese 73%-ynan buzýshylyqtar anyqtaldy.

Negizgi buzýshylyqtar – tańbalaý talaptarynyń saqtalmaýy (46 jaǵdaı nemese 73%), (taýar týraly aqparattyń, quramy týraly málimettiń, memlekettik tildegi aqparattyń bolmaýy).

17 jaǵdaı nemese 27% sanıtarııalyq-epıdemıologııalyq talaptardyń buzylýyna qatysty (quramy boıynsha sáıkessizdik, jaramdylyq merzimi ótken taýardy satý, tıisti qujattardyń bolmaýy).

– Taǵy bir mysal. Óńirge issaparmen kelgen azamat ınternet arqyly qonaqúıden nómirdi aldyn ala brondaǵan. Saıttaǵy sýretter men sıpattamaǵa qaraǵanda, jaǵdaıy qolaıly bolyp kóringen. Bir táýlikke ol 22 000 teńge tólegen. Alaıda kelgen kezde nómirdiń ishi las bolyp, salqyndatqyshtyń istemeıtini jáne ystyq sý joq ekeni belgili bolady. Klıenttiń shaǵymyna qonaqúı ákimshisi «bári saıttaǵy sıpattamaǵa saı» dep jaýap bergen. Osydan keıin azamat departamertke júginedi. ​QR «Tutynýshylardyń quqyqtaryn qorǵaý týraly» Zańynyń 27-babyna sáıkes, eger qyzmet sapasyz kórsetilse, azamat aqshasyn qaıtarýdy nemese soǵan teń dárejedegi basqa qyzmet kórsetýdi talap etýge quqyly. Sotqa deıingi retteý nátıjesinde qonaqúı klıentke 44 000 teńge qaıtaryp, resmı túrde keshirim surady, - dep atap ótti vedomstvo ókilderi.

Osyǵan deıin ShQO-da bıyl quqyǵy buzylǵan tutynýshylarǵa 37 mln teńge qaıtarylǵany jóninde jazǵan edik.